കൊല്ക്കത്ത: ദുര്ഗാപൂജ സമയത്ത് മാംസാഹാരം കഴിക്കരുത് എന്ന് പറഞ്ഞ ബാബാ ബാഗേശ്വറിന്റെ ചിത്രം കത്തിച്ച കോണ്ഗ്രസ് നേതാവ് അതാനു ദാസിനെ ബംഗാള് പൊലീസ് അറസ്റ്റ് ചെയ്തു.
മധ്യപ്രദേശിലെ ബാഗേശ്വര് ധാമിലെ മുഖ്യപൂജാരി ബാബാ ബാഗേശ്വര് എന്നറിയപ്പെടുന്ന ധീരേന്ദ്ര ശാസ്ത്രി ആണ് ബംഗാളിലെ ഹിന്ദുക്കള് ദുര്ഗാപൂജ സമയത്ത് പൂജാപന്തലിനടുത്ത് മാംസാഹാരം പാചകം ചെയ്യുന്നത് ഒഴിവാക്കി ശുദ്ധി പാലിക്കണം എന്നാവശ്യപ്പെട്ടത്.
ബാബയുടെ പ്രസ്താവനയ്ക്കെതിരെ ബംഗാളില് വന് പ്രതിഷേധമാണുയര്ന്നത്.സെപ്റ്റംബര് എട്ടിന് കൊല്ക്കത്ത ജില്ലാ കോണ്ഗ്രസ് കമ്മിറ്റി ഭവാനിപൂര് പൊലീസ് സ്റ്റേഷനില് ഇയാള്ക്കെതിരെ കേസ് ഫയല് ചെയ്തിരുന്നു. ഇതിനുപിന്നാലെയാണ് പൊലീസ് സ്റ്റേഷനു മുന്പിലായി ബാബയുടെ ചിത്രം കത്തിച്ച് പ്രകടനം നടത്തിയത്.
ഒരു വിഷയത്തില് അഭിപ്രായം പ്രകടിപ്പിച്ച ഒരു സന്ന്യാസിക്കെതിരെ പ്രതിഷേധിച്ചവര്ക്കെതിരെ നടപടിയെടുക്കണമെന്ന് ബംഗാള് മുഖ്യമന്ത്രി സുവേന്ദു അധികാരി വ്യാഴാഴ്ച നിയമസഭയില് പറഞ്ഞിരുന്നു. ഇതിനു പിന്നാലെയാണ് അറസ്റ്റ്.
‘അദ്ദേഹത്തിന്റെ അഭിപ്രായം സ്വീകരിക്കണമെന്നുള്ളവര്ക്ക് അത് ചെയ്യാം. അല്ലാത്തവര് ചെയ്യണ്ട. ഭവാനിപൂര് പൊലീസ് സ്റ്റേഷനുമുന്നില് അദ്ദേഹത്തിന്റെ ചിത്രം കത്തിച്ചവരെ കണ്ടു. ഈ സംസ്ഥാനത്ത് ഇതുപോലെയുള്ള പ്രവൃത്തികള് അനുവദിക്കാനാവില്ല. പ്രീണന രാഷ്ട്രീയം ഇനിയും ആവശ്യമില്ല’, സുവേന്ദു അധികാരി നിയമസഭയില് പറഞ്ഞു.
ദുര്ഗാപൂജ സമയത്ത് മാംസം ഭക്ഷിക്കുന്നവര് ദൈവനിഷേധികളാണെന്നും ബാബ പറഞ്ഞിരുന്നു. സംസ്ഥാനത്തെ ബി.ജെ.പി നേതാക്കള് തന്നെ ഈ പ്രസ്താവനയെ തള്ളിപ്പറഞ്ഞിരുന്നു.
അതാനുദാസിനെ അറസ്റ്റ് ചെയ്തത് ജനാധിപത്യവിരുദ്ധമാണെന്നും പ്രതിപക്ഷത്തെ അടിച്ചമര്ത്താന് സംസ്ഥാന സര്ക്കാര് പോലീസിനെ ഉപയോഗിക്കുകയാണെന്നും കോണ്ഗ്രസ് പറഞ്ഞു. ഈ അറസ്റ്റ് ഫാസിസ്റ്റ് ആക്രമണമാണെന്ന് സംസ്ഥാന കോണ്ഗ്രസ് പ്രസിഡന്റ് സുവങ്കര് സര്ക്കാര് ആരോപിച്ചു. ഇതിന് മുന്നില് പാര്ട്ടി കീഴടങ്ങില്ലെന്നും അദ്ദേഹം പറഞ്ഞു.
അതാനു ദാസിന് ജാമ്യം അനുവദിക്കണമെന്നാവശ്യപ്പെട്ട് വെള്ളിയാഴ്ച മുതല് സംസ്ഥാനമൊട്ടാകെ പ്രക്ഷോഭത്തിനൊരുങ്ങുകയാണ് കോണ്ഗ്രസ്.
മുന്പ് മമതാ ബാനര്ജി സര്ക്കാര് ചെയ്തിരുന്നതിന്റെ തുടര്ച്ചയാണ് ഇപ്പോഴത്തെ സര്ക്കാരും ചെയ്യുന്നതെന്ന സി.പി.ഐ.എം നേതാവ് സുജന് ചക്രവര്ത്തി പറഞ്ഞു.
Content Highlight: Bengal Congress leader arrested after protest over Bageshwar Baba remarks
