റിയാദ്: ഇറാൻ അനുകൂല ഹൂത്തികളും സൗദി അറേബ്യയുടെ പിന്തുണയുള്ള യെമൻ ഔദ്യോഗിക സർക്കാരും തമ്മിലുള്ള യുദ്ധം അതിരൂക്ഷമായി തുടരുന്നു. ഇതിനിടയിൽ, സൗദി തലസ്ഥാനമായ റിയാദിലെ പ്രമുഖ എണ്ണക്കമ്പനിയായ അരാംകോയുടെ കേന്ദ്രത്തിന് നേരെ ആക്രമണം നടത്തിയതായി യെമനിലെ ഹൂത്തികൾ വെളിപ്പെടുത്തി.
ശനിയാഴ്ച എക്സിലൂടെയാണ് ഹൂത്തി സൈനിക വക്താവ് യഹ്യ സരീ ഇക്കാര്യം വ്യക്തമാക്കിയത്. ബാലിസ്റ്റിക് മിസൈലുകളും ഡ്രോണുകളും ഉപയോഗിച്ച് റിയാദിലെ അരാംകോ കേന്ദ്രത്തിന് നേരെ സൈനിക നീക്കം നടത്തിയെന്നും, ആക്രമണത്തിൽ കേന്ദ്രത്തിൽ വലിയ രീതിയിൽ തീപിടിത്തമുണ്ടായെന്നും അദ്ദേഹം പറഞ്ഞു.
ശനിയാഴ്ച റിയാദിലെ അരാംകോ പരിസരത്തുനിന്ന് വലിയ തോതിൽ തീയും പുകയും ഉയരുന്നത് പ്രദേശവാസികൾ കണ്ടിരുന്നു.
എന്നാൽ, റിയാദിലെ കേന്ദ്രം ആക്രമിച്ചുവെന്ന ഹൂത്തികളുടെ വാദം അടിസ്ഥാനരഹിതവും ജനങ്ങളെ തെറ്റിദ്ധരിപ്പിക്കുന്നതുമാണെന്ന് സൗദി സഖ്യസേനയുടെ വക്താവ് തുർക്കി അൽ മാലികി ശനിയാഴ്ച വൈകുന്നേരം പ്രതികരിച്ചു.
യെമൻ സർക്കാരിന് അനുകൂലമായി പോരാടുന്ന സൗദി നേതൃത്വത്തിലുള്ള സഖ്യസേനയുടെ ഭാഗത്തുനിന്നാണ് ഈ വിശദീകരണം വന്നത്.
ഇതിനുപിന്നാലെ ഞായറാഴ്ച പുലർച്ചെ, ടോർ അൽ-ബഹ, തായ്സ് എന്നീ പ്രധാന മേഖലകളിലെ ഹൂത്തി കേന്ദ്രങ്ങൾക്ക് നേരെ സഖ്യസേന അതിശക്തമായ തിരിച്ചടി നൽകി.
യുദ്ധവിമാനങ്ങൾ, ഡ്രോണുകൾ, മിസൈലുകൾ, പീരങ്കികൾ, എന്നിവയും സ്നൈപ്പർമാരെയും ഉപയോഗിച്ച് 97 കേന്ദ്രങ്ങളിലാണ് കൃത്യമായി ആക്രമണം നടത്തിയത്.
ഈ പ്രത്യാക്രമണത്തിൽ 260-ലധികം ഹൂത്തി പോരാളികൾ കൊല്ലപ്പെടുകയോ പരിക്കേൽക്കുകയോ ചെയ്തിട്ടുണ്ടെന്നും അവരുടെ 44 സൈനിക വാഹനങ്ങൾ തകർക്കുകയോ ഉപയോഗശൂന്യമാക്കുകയോ ചെയ്തുവെന്നും യെമൻ സർക്കാർ സൈനിക വക്താവ് കേണൽ മാജെദ് അബ്ദുല്ല അൽ-നസിലി അറിയിച്ചു.
കഴിഞ്ഞ മാസാവസാനം സൗദിയുടെ പടിഞ്ഞാറൻ തീരത്തുള്ള യാൻബു തുറമുഖ നഗരത്തിലെ അരാംകോ കേന്ദ്രത്തിന് നേരെയും ആക്രമണം നടത്തിയതായി ഹൂത്തികൾ പറഞ്ഞിരുന്നു.
എന്നാൽ അന്ന് ത്വാഇഫിലേക്കും യാൻബുവിലേക്കും ഹൂത്തികൾ തൊടുത്ത ആറ് ബാലിസ്റ്റിക് മിസൈലുകൾ സൗദി സേന ആകാശത്തുവെച്ചുതന്നെ തകർക്കുകയാണുണ്ടായത്. അരാംകോ കേന്ദ്രങ്ങൾക്ക് യാതൊരു നാശനഷ്ടവും വന്നിട്ടില്ലെന്നും സൗദി അറേബ്യ വ്യക്തമാക്കിയിരുന്നു.
ഇതിനുപുറമെ, വിശുദ്ധ നഗരമായ മദീനയിലെ ഒരു വൈദ്യുതി നിലയത്തിന് നേരെയും ചൊവ്വാഴ്ച ഹൂത്തികൾ ആക്രമണശ്രമം നടത്തിയതായി സൗദി സഖ്യസേന അറിയിച്ചിരുന്നു. 2022-ൽ ഇരുവിഭാഗങ്ങളും തമ്മിൽ ഉണ്ടാക്കിയ താൽക്കാലിക സമാധാന കരാർ കഴിഞ്ഞ ജൂലൈയിൽ തകർന്നതോടെയാണ് മേഖലയിൽ വീണ്ടും യുദ്ധം കനത്തത്.
ലോകത്തെ പ്രധാന എണ്ണക്കടത്തു പാതയായ ബാബ് അൽ-മന്ദബ് കടലിടുക്കിലെ പ്രധാന ദ്വീപുകളും മോഖ തുറമുഖ നഗരവും സെപ്റ്റംബർ പകുതിയോടെ ഹൂത്തികൾ പിടിച്ചെടുത്തിരുന്നു. എന്നാൽ പിന്നീട് ഹൂത്തി വിരുദ്ധ സേനകൾ ശക്തമായി തിരിച്ചടിച്ച് അതിർത്തികൾ വീണ്ടും നിയന്ത്രണത്തിലാക്കി.
യെമനിൽ യുദ്ധം വീണ്ടും തുടങ്ങിയതോടെ ലക്ഷക്കണക്കിന് സാധാരണക്കാരാണ് ഭവനരഹിതരായി നാടുവിടേണ്ടി വന്നത്. 2014-ൽ ഹൂത്തികൾ രാജ്യതലസ്ഥാനമായ സൻആ പിടിച്ചടക്കുകയും ഔദ്യോഗിക സർക്കാരിന് മറ്റൊരു നഗരമായ ഏദനിലേക്ക് നാടുവിടേണ്ടി വരികയും ചെയ്തതുമുതൽ തുടങ്ങിയ ഈ ദുരിതം യെമനിൽ ഇപ്പോഴും തുടരുകയാണ്.
Content Highlight:Fighting intensifies in Yemen: Houthis claim attack on Aramco facility in Riyadh.
