സി.ജെ.പി സഹ കണ്‍വീനര്‍മാരായ അശുതോഷ് രങ്കയും സൗരവ് ദാസും ജുഡീഷ്യല്‍ കസ്റ്റഡിയില്‍ കഴിയുന്നതിനിടെ സി.ജെ.പി പ്രവര്‍ത്തകരെ അഭിസംബോധന ചെയ്ത് വീഡിയോ സന്ദേശവുമായി അഭിജിത് ദീപ്‌കെ. ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധങ്ങള്‍ക്ക് താത്കാലിക ഇടവേള നല്‍കി കുടുംബങ്ങള്‍ക്കൊപ്പം ചെലവഴിക്കണമെന്ന് വീഡിയോ സന്ദേശത്തില്‍ സി.ജെ.പി പ്രവര്‍ത്തകരോട് ദീപ്‌കെ പറഞ്ഞു.
‘നമ്മള്‍ പോരാടുന്നത് വെറുപ്പിനെതിരെയാണ്. മനസ്സില്‍ വെറുപ്പ് മാത്രം സൂക്ഷിക്കുന്ന ആളുകള്‍ക്കെതിരെയാണ് നമ്മള്‍ പോരാടുന്നത്. എന്നാല്‍, ഈ വെറുപ്പ് നമ്മളിലും വേരുപിടിക്കുന്നില്ലെന്ന് ഉറപ്പാക്കേണ്ടതുണ്ട്.
നമ്മളെ പ്രകോപിപ്പിക്കാനും, അവരെപ്പോലെ തന്നെ വെറുപ്പോടെ പ്രതികരിക്കാനും നമ്മളെ നിര്‍ബന്ധിതരാക്കാനുമാണ് അവര്‍ നമ്മളെ ബുദ്ധിമുട്ടിക്കുന്നത്. എന്നാല്‍ നമ്മള്‍ അതിന് പോവില്ല. ഇത് ഉറപ്പാക്കാന്‍, നിങ്ങളുടെ പ്രിയപ്പെട്ടവരുടെ, നിങ്ങളെ സ്‌നേഹിക്കുന്നവരുടെയും, നിങ്ങള്‍ സ്‌നേഹിക്കുന്നവരുടെയുംഅരികില്‍ ഉണ്ടായിരിക്കേണ്ടത് അത്യാവശ്യമാണ്. അതിനാല്‍, നിങ്ങള്‍ നിങ്ങളുടെ പ്രിയപ്പെട്ടവര്‍ക്കും കുടുംബാംഗങ്ങള്‍ക്കും ഒപ്പം നില്‍ക്കണമെന്നും, വെറുപ്പ് നിങ്ങളെ ബാധിക്കാന്‍ അനുവദിക്കരുതെന്നും ഞാന്‍ ആഗ്രഹിക്കുന്നു,’ ദീപ്‌കെ സന്ദേശത്തില്‍ പറഞ്ഞു.
ദീപ്‌കെയുടെ സന്ദേശത്തിന്റെ പൂര്‍ണ രൂപം
നമസ്‌കാരം, പാറ്റകളേ എല്ലാവര്‍ക്കും സുഖമാണോ? നിങ്ങള്‍ എല്ലാവരും സുഖമായിരിക്കുന്നു എന്ന് കരുതുന്നു. നമ്മള്‍ നടത്തിക്കൊണ്ടിരിക്കുന്ന പോരാട്ടം കാരണം, കഴിഞ്ഞ കുറച്ചു ദിവസങ്ങളായി നിങ്ങള്‍ തെരുവുകളിലും വ്യക്തിജീവിതത്തിലും വലിയ പ്രയാസങ്ങള്‍ നേരിടുന്നുണ്ടെന്ന് ഞാന്‍ മനസ്സിലാക്കുന്നു.
നിങ്ങള്‍ കടന്നുപോകുന്ന അവസ്ഥ എനിക്ക് നന്നായി മനസ്സിലാക്കാന്‍ കഴിയുന്നുണ്ട്. നിങ്ങള്‍ വളരെയധികം സഹനങ്ങള്‍ക്ക് വിധേയരായിരിക്കുന്നു. ഈ വ്യവസ്ഥിതി മുഴുവന്‍ നിങ്ങളെ അടിച്ചമര്‍ത്താന്‍ ശ്രമിക്കുകയാണെന്നത് വ്യക്തമാണ്.
സ്വന്തം വിശ്വാസങ്ങള്‍ക്കു വേണ്ടിയും, അതിലുപരിയായി ശരിയായ കാര്യത്തിനു വേണ്ടിയും പോരാടുന്ന, ഇത്രയധികം നിസ്വാര്‍ത്ഥരും നീതിബോധമുള്ളവരുമായ ആളുകള്‍ ഒപ്പമുള്ളതില്‍ ഞാന്‍ അതീവ ഭാഗ്യവാനാണെന്ന് പറയട്ടെ. നിങ്ങള്‍ കൂടെയുണ്ടായതിന്, എനിക്കും അശുതോഷിനും സൗരവിനും മറ്റെല്ലാവര്‍ക്കും ഒപ്പം നിന്നതിന്, ഏറ്റവും പ്രധാനമായി, പരസ്പരം താങ്ങായി നിന്നതിന് എല്ലാവര്‍ക്കും വലിയ നന്ദി.
നിങ്ങള്‍ പരസ്പരം പിന്തുണച്ച രീതി ഇന്ത്യയുടെ യഥാര്‍ത്ഥ ചൈതന്യത്തെയാണ് പ്രതിഫലിപ്പിക്കുന്നത്.
എനിക്കൊരു അഭ്യര്‍ത്ഥനയുണ്ട്. കഴിഞ്ഞ കുറച്ചു ദിവസങ്ങള്‍ ഒട്ടും എളുപ്പമായിരുന്നില്ല. ജന്തര്‍ മന്തറിലെ നമ്മുടെ ആദ്യ പ്രതിഷേധം മുതല്‍ ഞാന്‍ പറഞ്ഞുകൊണ്ടിരുന്നതുപോലെ, കാര്യങ്ങള്‍ ദുഷ്‌കരമാകുമെന്ന് ഉറപ്പായിരുന്നു.
നമ്മുടെ ലക്ഷ്യങ്ങള്‍ എളുപ്പത്തില്‍ നേടിയെടുക്കാന്‍ അവര്‍ നമ്മളെ അനുവദിക്കില്ലായിരുന്നു. ഇപ്പോള്‍ സംഭവിക്കുന്നതും അത് തന്നെയാണ്. ഓര്‍മ്മയുണ്ടോ, ജന്തര്‍ മന്തറില്‍ വെച്ച് ഞാന്‍ പലപ്പോഴും പറഞ്ഞിരുന്നു, അവസാനം അവര്‍ പോലീസിനെ ഉപയോഗിച്ച് നമ്മളെ നേരിടുമെന്നും കേസുകള്‍ ചുമത്തുമെന്നും പലവിധത്തില്‍ നമ്മളെ കുടുക്കാന്‍ ശ്രമിക്കുമെന്നും. ഇപ്പോള്‍ കൃത്യമായി സംഭവിക്കുന്നത് അതാണ്. എന്നിട്ടും, ഈ പ്രത്യാഘാതങ്ങളെക്കുറിച്ച് അറിഞ്ഞുകൊണ്ട് തന്നെ, നിങ്ങള്‍ കാണിക്കുന്ന ധൈര്യവും ഐക്യവും ശരിക്കും അഭിനന്ദനാര്‍ഹമാണ്.
ഞാന്‍ നിങ്ങളെ എല്ലാവരെയും അഭിവാദ്യം ചെയ്യുന്നു, ഹൃദയത്തിന്റെ അടിത്തട്ടില്‍ നിന്ന് നന്ദി അറിയിക്കുന്നു. കഴിഞ്ഞ 10-12 ദിവസങ്ങളായി നമ്മള്‍ പലതും കണ്ടു. സൗരവിനും അഷുവിനും നേരിടേണ്ടി വരുന്ന പ്രയാസങ്ങള്‍, നിങ്ങള്‍ ഓരോരുത്തര്‍ക്കും ഒരുപോലെ പ്രയാസകരമാണെന്ന് എനിക്കറിയാം. ഇക്കാര്യം എനിക്ക് നന്നായി ബോധ്യമുണ്ട്.
തെരുവുകളില്‍ എത്രയോ സന്നദ്ധപ്രവര്‍ത്തകര്‍ക്ക് മര്‍ദ്ദനമേറ്റുവെന്നും, അവരെ കസ്റ്റഡിയിലെടുക്കുകയും അവിടെ വലിയ ദുരിതങ്ങള്‍ക്ക് വിധേയരാക്കുകയും ചെയ്തുവെന്നും ഞാന്‍ കണ്ടതാണ്. എന്നാല്‍ നമ്മുടെ കുടുംബങ്ങളെ സംബന്ധിച്ചിടത്തോളം ഇത് ഇതിലും എത്രയോ കഠിനമാണ്കാരണം, നമ്മള്‍ നടത്തുന്ന ഈ പോരാട്ടം അവരുടെ തീരുമാനമായിരുന്നില്ലല്ലോ.
ഇത് ഞങ്ങളുടെ തീരുമാനമായിരുന്നു, എന്നാല്‍ ഇതിന്റെ പ്രത്യാഘാതങ്ങള്‍ ഞങ്ങളുടെ കുടുംബങ്ങളെയും ബാധിക്കുന്നുണ്ട്. അതിനാല്‍, നിങ്ങളോട് എല്ലാവരോടുംഎന്റെ എല്ലാ പാറ്റകളോടും ഞാനൊരു അഭ്യര്‍ത്ഥന നടത്തട്ടെ. അടുത്ത കുറച്ചു ദിവസങ്ങളില്‍ ദയവായി നിങ്ങളുടെ കുടുംബത്തോടൊപ്പം സമയം ചെലവഴിക്കുക. ആഘോഷക്കാലം വരാനിരിക്കുകയാണ്. കഴിഞ്ഞ കുറച്ചു ദിവസങ്ങളിലായി നടന്ന കാര്യങ്ങള്‍ കാരണം, എന്റെയും അശുതോഷിന്റെയും സൗരവിന്റെയും കുടുംബങ്ങളെപ്പോലെ തന്നെ, നിങ്ങളുടെ കുടുംബങ്ങളും വളരെയധികം ആശങ്കയിലായിരിക്കും. അതുകൊണ്ട്, കുറച്ചു കാലത്തേക്ക് നിങ്ങളുടെ കുടുംബത്തോടൊപ്പം സമയം ചെലവഴിക്കുക. നിങ്ങളുടെ പ്രിയപ്പെട്ടവര്‍ക്ക് താങ്ങായി കൂടെയുണ്ടാവുക.
നമ്മള്‍ പോരാടുന്നത് വെറുപ്പിനെതിരെയാണ്. മനസ്സില്‍ വെറുപ്പ് മാത്രം സൂക്ഷിക്കുന്ന ആളുകള്‍ക്കെതിരെയാണ് നമ്മള്‍ പോരാടുന്നത്. എന്നാല്‍, ഈ വെറുപ്പ് നമ്മളിലും വേരുപിടിക്കുന്നില്ലെന്ന് ഉറപ്പാക്കേണ്ടതുണ്ട്. സൗരവിനും അഷുവിനും സംഭവിക്കുന്ന കാര്യങ്ങള്‍ എല്ലാവരിലും വലിയ വിഷമം ഉണ്ടാക്കുന്നുണ്ടെന്ന് എനിക്കറിയാം.
എനിക്കും ഇത് വലിയ മാനസിക പ്രയാസമുണ്ടാക്കുന്നുണ്ട്. എന്നാല്‍ ഒരു കാര്യം ഓര്‍ക്കുക. നമ്മള്‍ വെറുക്കുന്ന ആ അവസ്ഥയിലേക്ക് നമ്മള്‍ തന്നെ മാറാന്‍ പാടില്ല. അവര്‍ക്ക് സംഭവിക്കുന്നത് തെറ്റാണ്‌ വളരെ വലിയ തെറ്റ് തന്നെ. എന്നാല്‍ നമ്മള്‍ തിരഞ്ഞെടുത്ത സമാധാനത്തിന്റെയും സ്‌നേഹത്തിന്റെയും കാരുണ്യത്തിന്റെയും പാതയില്‍ നിന്ന് നമ്മളെ വ്യതിചലിപ്പിക്കാനാണ് അവര്‍ ശ്രമിക്കുന്നത്. നമ്മളെ പ്രകോപിപ്പിക്കാനും, അവരെപ്പോലെ തന്നെ വെറുപ്പോടെ പ്രതികരിക്കാനും നമ്മളെ നിര്‍ബന്ധിതരാക്കാനുമാണ് അവര്‍ നമ്മളെ ബുദ്ധിമുട്ടിക്കുന്നത്. എന്നാല്‍ നമ്മള്‍ അതിന് മുതിരില്ല. ഇത് ഉറപ്പാക്കാന്‍, നിങ്ങളുടെ പ്രിയപ്പെട്ടവരുടെ,നിങ്ങളെ സ്‌നേഹിക്കുന്നവരുടെയും, നിങ്ങള്‍ സ്‌നേഹിക്കുന്നവരുടെയുംഅരികില്‍ ഉണ്ടായിരിക്കേണ്ടത് അത്യാവശ്യമാണ്. അതിനാല്‍, നിങ്ങള്‍ നിങ്ങളുടെ പ്രിയപ്പെട്ടവര്‍ക്കും കുടുംബാംഗങ്ങള്‍ക്കും ഒപ്പം നില്‍ക്കണമെന്നും, വെറുപ്പ് നിങ്ങളെ ബാധിക്കാന്‍ അനുവദിക്കരുതെന്നും ഞാന്‍ ആഗ്രഹിക്കുന്നു.
അതാണ് നമ്മുടെ ഏറ്റവും വലിയ ശക്തി,നമ്മുടെ കാരുണ്യവും, പരസ്പരമുള്ള സ്‌നേഹവും, ദയയും. അതുകൊണ്ടാണ്, എനിക്ക് പരിചയമില്ലാത്ത ആളുകള്‍ക്ക് വേണ്ടിയും നമ്മള്‍ പോരാടുന്നത് എന്ന് ഞാന്‍ വിശ്വസിക്കുന്നു. അങ്ങനെ തന്നെയാണ് വേണ്ടതും. നിങ്ങള്‍ക്ക് പരിചയമില്ലാത്ത ആളുകള്‍ക്ക് വേണ്ടിയും നിങ്ങള്‍ എപ്പോഴും നിലകൊള്ളണം. കാരണം, നാളെ നിങ്ങള്‍ക്ക് എന്തെങ്കിലും മോശം സംഭവിച്ചാല്‍, അപരിചിതനായ ഒരാളെങ്കിലും നിങ്ങള്‍ക്കായി ശബ്ദമുയര്‍ത്താന്‍ അവിടെയുണ്ടാകണം.
ഇത്രയേ ഉള്ളൂ കാര്യം. ഞാന്‍ സൗരവിന്റെ അമ്മയോടും സംസാരിച്ചിരുന്നു; ഞാന്‍ അവര്‍ക്ക് ധൈര്യം പകര്‍ന്നുനല്‍കേണ്ടതിന് പകരം, അവര്‍ എന്നോട് പറഞ്ഞു. ‘വിഷമിക്കേണ്ട. ടീമിലുള്ള എല്ലാവരോടും സ്വന്തം കാര്യത്തില്‍ ശ്രദ്ധിക്കാന്‍ പറയൂ. സൗരവ് ഒരു പോരാളിയാണ് അവന് എല്ലാം അതിജീവിച്ചോളും,’ എന്ന്.
അവന് അത് തെളിയിക്കുകയും ചെയ്തു. അഞ്ചോ ആറോ ദിവസത്തെ ജയില്‍വാസത്തിന് ശേഷം ഇന്നലെ അവന് പുറത്തേക്ക് വന്ന രീതി കണ്ടാല്‍. അവനെ തകര്‍ക്കാന്‍ ഒന്നിനും കഴിയില്ലെന്ന് വ്യക്തമാണ്. ഒന്നിനും!
ജന്തര്‍ മന്തറില്‍ ഇരിക്കുമ്പോള്‍, ‘നമ്മള്‍ ജയിലിലായാല്‍, ഓരോരുത്തര്‍ക്കും എത്ര ദിവസം പിടിച്ചുനില്‍ക്കാന്‍ കഴിയും?’ എന്ന് ഞങ്ങള്‍ തമാശരൂപേണ ചോദിക്കാറുണ്ടായിരുന്നു. ഞാനോ മറ്റുള്ളവരോ അവനോട് ചോദിക്കുമ്പോഴെല്ലാം, ‘എനിക്ക് ഒരു ദിവസം പോലും പിടിച്ചുനില്‍ക്കാന്‍ കഴിയില്ല!’ എന്നായിരുന്നു അവന് മറുപടി പറഞ്ഞിരുന്നത്. എന്നിട്ടും, അവന് ആറ് ദിവസം ജയിലില്‍ കിടന്നു.
എന്നിട്ടും മുഖത്ത് പുഞ്ചിരിയുമായാണ് പുറത്തുവന്നത്. എന്താണ് അവന് സംഭവിച്ചതെന്ന് എനിക്കറിയില്ല!
സൗരവിനെ ആളുകള്‍ അവന്റെ ‘കോള്‍ഡ് കോഫി’യുടെ പേരില്‍ കളിയാക്കിയിരുന്നത് ഓര്‍മ്മയുണ്ടോ? അവന് ജീവിതത്തില്‍ ഒന്നും നേടാന്‍ പോകുന്നില്ലെന്നും, അവന് വളരെയധികം ‘സൗകര്യങ്ങള്‍ അനുഭവിച്ചു വളര്‍ന്നവനാണെന്നും’ പറഞ്ഞ് പലരും അവനെ പരിഹസിച്ചു. പ്രതിഷേധ സമരങ്ങളില്‍ പോലും അവന് കോള്‍ഡ് കോഫിയോ സ്റ്റാര്‍ബക്‌സ് കാപ്പിയോ കുടിച്ചുകൊണ്ട് വരുമായിരുന്നു! എന്നാല്‍ അതേ സൗരവ് ദാസ് തന്നെയാണ് ഇപ്പോള്‍ ജയില്‍ സെല്ലിനുള്ളില്‍ നിന്ന് പോരാടുന്നത്.
‘വളരെ മൃദുവായ സ്വഭാവക്കാരന്‍’ എന്ന് ആളുകള്‍ മുദ്രകുത്തിയ, പിടിച്ചുനില്‍ക്കാനോ പോരാടാനോ കഴിയില്ലെന്ന് പലരും കരുതിയ അതേ വ്യക്തി, ആറ് ദിവസത്തിലേറെയായി ജയിലിലാണ്. അതെല്ലാം കഴിഞ്ഞിട്ടും, മുഖത്ത് പുഞ്ചിരിയുമായാണ് അവന് കോടതിയില്‍ ഹാജരായത്. അവനില്‍ ഒട്ടും ഭയമില്ല.
ഇനി അശുതോഷിന്റെ കാര്യം പറയുകയാണെങ്കില്‍. എന്താണ് അവനെക്കുറിച്ച് പറയുക? ഈ പ്രസ്ഥാനത്തെ യഥാര്‍ത്ഥത്തില്‍ മുന്നോട്ട് നയിച്ചത് അശുവും സൗരവുമാണെന്ന് എനിക്ക് എപ്പോഴും തോന്നിയിട്ടുണ്ട്. അവര്‍ രണ്ടുപേരും വളരെ വലിയ പങ്കാണ് വഹിച്ചത്. സത്യം പറഞ്ഞാല്‍, ഞാന്‍ അവരുടെ നിര്‍ദ്ദേശങ്ങള്‍ അനുസരിക്കുക മാത്രമാണ് ചെയ്തത്. അതാണ് വാസ്തവം.
സൗരവും എന്നോട് എന്താണോ ചെയ്യാന്‍ പറഞ്ഞത്, അത് നടപ്പിലാക്കുക എന്നത് മാത്രമായിരുന്നു എന്റെ ജോലി. പുറത്തുള്ളവര്‍ക്ക് ഞാന്‍ ഒരുപക്ഷേ നേതാവാണെന്ന് തോന്നാം, പക്ഷേ ഞാനായിരുന്നില്ല നേതാവ്. സൗരവും അശുവും ആയിരുന്നു അത്. അവര്‍ എന്നോട്, ‘നാളെ നീ ഇവിടെ പോകണം, നാളെ നീ ഇന്ന കാര്യം ചെയ്യണം’ എന്നൊക്കെ പറയും. അപ്പോള്‍ ഞാന്‍, ‘ശരി, തീര്‍ച്ചയായും, ഞാന്‍ അത് ചെയ്‌തോളാം’ എന്ന് മറുപടി പറയും.
കാരണം, അവര്‍ക്കുള്ള കഴിവുകള്‍, പ്രത്യേകിച്ച് തീരുമാനങ്ങള്‍ എടുക്കാനുള്ള അവരുടെ ശേഷി എന്റേതിനേക്കാള്‍ മികച്ചതാണെന്ന് എനിക്കറിയാം. അതാണ് അവരുടെ സ്വഭാവം.
ഞാന്‍ സൗരവിന്റെ അമ്മയുമായി സംസാരിച്ചു. എല്ലാവരും സ്വന്തം കാര്യങ്ങള്‍ ശ്രദ്ധിക്കണമെന്നും സൗരഭിനെക്കുറിച്ച് ഓര്‍ത്ത് വിഷമിക്കേണ്ടെന്നും അവര്‍ പറഞ്ഞു. അവന് സുഖമായിരിക്കുന്നു.
ഞാന്‍ അശുവിന്റെ കുടുംബവുമായും സംസാരിച്ചു. അശുതോഷ് ജയിലിലായിരിക്കെ അവന്റെ അമ്മാവന്‍ മരണപ്പെട്ടു. ആ സംസ്‌കാരച്ചടങ്ങില്‍ പങ്കെടുക്കാന്‍ അവന് സാധിച്ചില്ല. അവന്റെ അമ്മ ഇപ്പോള്‍ കുടുംബാംഗങ്ങള്‍ക്കൊപ്പമുണ്ട്. അവരെ കാണണമെന്ന് എനിക്കുണ്ടായിരുന്നു, എന്നാല്‍ കുടുംബത്തിലുണ്ടായ ഈ വിയോഗത്തിന്റെ പശ്ചാത്തലത്തില്‍, അതിന് അനുയോജ്യമായ സമയമായിരുന്നില്ല അത്.
എങ്കിലും, അശുതോഷിനെക്കുറിച്ച് ഓര്‍ത്ത് ഞങ്ങള്‍ വിഷമിക്കേണ്ടതില്ലെന്നും, എന്തുവന്നാലും അവര്‍ അത് നേരിട്ടോളുമെന്നും അവന്റെ അമ്മ ഉറപ്പിച്ചു പറഞ്ഞു. ശരിയായ കാര്യത്തിനുവേണ്ടിയാണ് അശു പോരാടുന്നത്. അവന്റെ അമ്മയും അച്ഛനും അവന് ഉറച്ച പിന്തുണയുമായി കൂടെയുണ്ട്. ദയവായി ആരും വിഷമിക്കേണ്ട. ഇപ്പോള്‍ തളര്‍ച്ചയോ അരക്ഷിതാവസ്ഥയോ അനുഭവിക്കുന്നവരോട് എനിക്ക് പറയാനുള്ളത് ഇതാണ്അങ്ങനെ തോന്നേണ്ടതില്ല.
സൗരവിന്റെയും അശുതോഷിന്റെയും കുടുംബാംഗങ്ങളുമായി ഞാന്‍ സംസാരിച്ചു. അവര്‍ ഒട്ടും ദുര്‍ബലരല്ല. ഈ നിമിഷം എനിക്ക് ലഭിക്കുന്ന കരുത്ത് അവരുടെ കുടുംബങ്ങളില്‍ നിന്നാണ്. അവരാണ് ഞങ്ങളുടെ ഏറ്റവും വലിയ ശക്തിസ്രോതസ്സ്.
സംഭവിച്ച കാര്യങ്ങള്‍ ഒരുപക്ഷേ ആരെയും തളര്‍ത്തിക്കളയാന്‍ പോന്ന സാഹചര്യങ്ങള്‍ഉണ്ടായിട്ടും, അവര്‍ ഒട്ടും ദുര്‍ബലരല്ല. വാസ്തവത്തില്‍, എനിക്ക് കരുത്ത് പകരുന്നത് അവരാണ്. അവര്‍ തന്നെയാണ് എനിക്ക് പ്രചോദനം നല്‍കുന്നത്.
കുടുംബാംഗങ്ങളുടെയും പ്രിയപ്പെട്ടവരുടെയും കൂടെ നില്‍ക്കേണ്ടത് എത്രത്തോളം പ്രധാനമാണെന്ന് ഇതില്‍ നിന്ന് മനസ്സിലാക്കാം.
ഞങ്ങള്‍ പിന്മാറാന്‍ പോകുന്നില്ല. സൗരഭിനെയും അശുവിനെയും ജയിലിലടച്ചതുകൊണ്ട് മാത്രം ഞങ്ങള്‍ ഭയന്നുപോകുമെന്ന് കരുതേണ്ട. ഞങ്ങള്‍ ഭയപ്പെടില്ല. എന്തിനു ഭയപ്പെടണം? ഞങ്ങള്‍ ശരിയായ കാര്യത്തിനുവേണ്ടിയാണ് പോരാടുന്നത്. ഞങ്ങള്‍ തെറ്റായൊന്നും ചെയ്യുന്നില്ല.
ഒരു കാര്യം കൂടി പറയട്ടെ, ഫ്രാന്‍സില്‍ നടക്കുന്ന സംഭവങ്ങളെ ചൂണ്ടിക്കാട്ടി ചിലര്‍ ചോദിക്കുന്നുണ്ട്’ഫ്രാന്‍സില്‍ എന്താണ് നടക്കുന്നതെന്ന് നോക്കൂ!’ അല്പം നാണം തോന്നണം! ഇന്ത്യയില്‍ എന്താണ് നടക്കുന്നതെന്ന് ഒന്ന് നോക്കൂ. സൗരവ് ദാസും അശുതോഷും പുഞ്ചിരിച്ചുകൊണ്ടാണ് ജയിലിലേക്ക് പോയത്. ഫ്രാന്‍സില്‍ നാം കണ്ടതുപോലെയുള്ള കാര്യങ്ങളൊന്നും അവര്‍ ചെയ്തില്ല. തങ്ങളെ അന്യായമായി തടവിലാക്കുകയാണെന്ന് അറിഞ്ഞിട്ടും, അവര്‍ സമാധാനവും അനുകമ്പയുമാണ് തിരഞ്ഞെടുത്തത്. ദേഷ്യമോ വെറുപ്പോ മനസ്സില്‍ സൂക്ഷിക്കാതെ, പുഞ്ചിരിച്ചുകൊണ്ടാണ് അവര്‍ ജയിലിലേക്ക് പോയത്. നമ്മുടെ പ്രസ്ഥാനത്തിന്റെ ഏറ്റവും വലിയ ശക്തി ഇതാണെന്ന് ഞാന്‍ വിശ്വസിക്കുന്നു.
നേരിട്ടുള്ള ഒരു താരതമ്യം നടത്താന്‍ ഉദ്ദേശിക്കുന്നില്ലെങ്കിലും, ഇത് മഹാത്മാഗാന്ധി ചെയ്ത കാര്യത്തെ ഓര്‍മ്മിപ്പിക്കുന്നു. അദ്ദേഹം ജയിലിലേക്ക് അയക്കപ്പെട്ടപ്പോള്‍, തന്റെ ‘സത്യാഗ്രഹ’ത്തിന്റെ ഭാഗമായി വളരെ ശാന്തമായാണ് പോയത്. സൗരഭും അശുവും അതേ ‘സത്യാഗ്രഹം’ തന്നെയാണ് പിന്തുടരുന്നത്.
ജയിലില്‍ കഴിയുമ്പോള്‍ ആ വേദനകളെല്ലാം സ്വയം സഹിച്ചുകൊണ്ട്, ഒരു അര്‍ത്ഥത്തില്‍ അവര്‍ ഈ രാജ്യത്തെ ഉണര്‍ത്തുകയാണ് ചെയ്യുന്നത്. സൗരഭും അശുവും ജയില്‍ മോചിതരാകുമ്പോള്‍ – ആ നിമിഷത്തിനായി ഞാന്‍ ആകാംക്ഷയോടെ കാത്തിരിക്കുകയാണ് – രാജ്യം മുഴുവന്‍ അവരെ ആദരിക്കുമെന്ന് എനിക്ക് ഉറപ്പുണ്ട്.
അവര്‍ സഹിച്ച ത്യാഗങ്ങള്‍ക്കായി രാജ്യം അവരെ അഭിവാദ്യം ചെയ്യും. എന്നിട്ടും, തങ്ങള്‍ എപ്പോഴും മനസ്സില്‍ സൂക്ഷിച്ചിരുന്ന അതേ സ്‌നേഹവും അനുകമ്പയും കൈവിടാതെ, ഒരു പുഞ്ചിരിയോടെ അവര്‍ തിരിച്ചുവരും. സൗരവിനെയും അശുതോഷിനെയും ജയിലിലടച്ചാല്‍ അവരെ ഭയപ്പെടുത്താനോ പേടിപ്പിക്കാനോ കഴിയുമെന്ന് കരുതുന്നവരോട് എനിക്ക് പറയാനുള്ളത് ഇതാണ്: അത് ഒരിക്കലും സംഭവിക്കില്ല. ജയില്‍ മോചിതരാകുമ്പോള്‍, അതേ പുഞ്ചിരിയോടെ, ‘ഇന്‍ക്വിലാബ് സിന്ദാബാദ്’ (വിപ്ലവം നീണാള്‍ വാഴട്ടെ) എന്ന് വിളിച്ചുകൊണ്ടായിരിക്കും അവര്‍ പുറത്തുവരിക.
തിരിച്ചുവരുമ്പോള്‍, അവര്‍ മഹാത്മാഗാന്ധിയുടെ പാതയില്‍, സമാധാനത്തിന്റെയും അഹിംസയുടെയും പാതയില്‍ തുടര്‍ന്നും സഞ്ചരിക്കും. കാരണം അതാണ് ഞങ്ങള്‍ യഥാര്‍ത്ഥത്തില്‍ വിശ്വസിക്കുന്നത്.
നേപ്പാള്‍, ബംഗ്ലാദേശ് തുടങ്ങിയ സ്ഥലങ്ങളെ ഉദാഹരണമായി ചൂണ്ടിക്കാണിക്കുന്നവരോട് പറയട്ടെ, നമ്മുടെ ആളുകളെ നോക്കൂ. അവര്‍ പുഞ്ചിരിച്ചുകൊണ്ടാണ് ജയിലിലേക്ക് നടന്നുകയറിയത്. അവര്‍ ഒട്ടും പ്രകോപിതരായില്ല. മഹാത്മാഗാന്ധിയുടെ മൂല്യങ്ങളില്‍ അവര്‍ ഉറച്ചുനില്‍ക്കുന്നു. ജയിലിലേക്ക് പോകുമ്പോഴായാലും കോടതിയില്‍ ഹാജരാകുമ്പോഴായാലും, അവര്‍ പുഞ്ചിരിച്ചുകൊണ്ടേയിരിക്കുന്നു.
നിങ്ങള്‍ക്ക് അവരിലേക്ക് വെറുപ്പ് കുത്തിവെക്കാന്‍ കഴിയില്ല. ആ വെറുപ്പ് നിങ്ങളുടെ ഉള്ളില്‍ തന്നെയാണ് ഉള്ളത്. ആ വെറുപ്പ് കാരണം നിങ്ങള്‍ ഈ രാജ്യത്തെ എത്തിച്ചിരിക്കുന്ന അവസ്ഥ എല്ലാവര്‍ക്കും കാണാം.
അതുകൊണ്ടാണ്, പരസ്പരം നമ്മള്‍ പുലര്‍ത്തുന്ന അനുകമ്പയും ദയയും സ്‌നേഹവും ഒട്ടും കുറയാന്‍ അനുവദിക്കരുത് എന്നത് വളരെ പ്രധാനമായിരിക്കുന്നത്. നമ്മളിലെ കരുണയും ദയയും ഇല്ലാതാകുന്ന ദിവസം, ഈ രാജ്യത്ത് വര്‍ഷങ്ങളായി ഭയം വിതയ്ക്കാനും വെറുപ്പ് പടര്‍ത്താനും ശ്രമിച്ചവര്‍ വിജയിക്കും. ആ വെറുപ്പ് പടരാന്‍ നമ്മള്‍ അനുവദിക്കരുത്.
സൗരവിനെയും അശുവിനെയും ഓര്‍ക്കുക. ആഘോഷവേളകളില്‍ നിങ്ങളെല്ലാവരും നിങ്ങളുടെ കുടുംബത്തോടൊപ്പം ആയിരിക്കണമെന്ന് ഞാന്‍ ആഗ്രഹിക്കുന്നു. എന്നാല്‍ കുടുംബത്തോടൊപ്പം ഇരിക്കുമ്പോള്‍, സൗരവിനെയും അശുവിനെയും കൂടി ഓര്‍ക്കണം.കാരണം അവര്‍ക്ക് അവരുടെ കുടുംബത്തോടൊപ്പം ഇരിക്കാന്‍ കഴിയില്ലല്ലോ. അവര്‍ നമ്മുടെ കുടുംബമാണ്.
ഈ സമയത്ത് അവരെ നമ്മുടെ ചിന്തകളില്‍ സൂക്ഷിക്കേണ്ടത് വളരെ പ്രധാനമാണ്. അവര്‍ തിരിച്ചുവരുമെന്ന് ഞാന്‍ ആത്മാര്‍ത്ഥമായി പ്രതീക്ഷിക്കുന്നു.
ചില നിസ്സാരരും ദയനീയരുമായ ട്രോളന്മാര്‍ ഒരുപക്ഷേ ഇങ്ങനെ പറഞ്ഞേക്കാം: ‘നോക്കൂ, ഇയാള്‍ വികാരാധീനനാകുന്നു,’ അല്ലെങ്കില്‍ ‘എല്ലാവരെയും കരയിപ്പിച്ചു കളഞ്ഞല്ലോ.’ എന്നാല്‍ അങ്ങനെയല്ലനമ്മുടെ വികാരങ്ങള്‍ നമ്മുടെ ബലഹീനതയല്ല, മറിച്ച് നമ്മുടെ ശക്തിയാണ്.
സൗരവും അശുവും എന്റെ സഹോദരന്മാരായതുകൊണ്ടാണ് ഞാന്‍ ഇപ്പോള്‍ വികാരാധീനനാകുന്നത്. അവര്‍ എന്റെ കുടുംബമാണ്. എനിക്ക് അവരോട് സ്‌നേഹവും കരുതലും ഉള്ളതുകൊണ്ടാണ് ഈ വികാരങ്ങള്‍ ഉണ്ടാകുന്നത്. അല്ലാതെ എനിക്ക് ഭയമുള്ളതുകൊണ്ടല്ല.
നിങ്ങളെ എനിക്ക് പേടിയില്ല. നിങ്ങള്‍ എന്നെ രണ്ടുദിവസം ജയിലില്‍ അടച്ചു, അന്നും എനിക്ക് പേടിയില്ലായിരുന്നു, ഇപ്പോഴും ഇല്ല. ഞാന്‍ പ്രകടിപ്പിക്കുന്ന ഈ വികാരങ്ങള്‍, എന്റെ സഹോദരന്മാരെ മറ്റെന്തിനേക്കാളും ഞാന്‍ സ്‌നേഹിക്കുന്നതുകൊണ്ട് മാത്രമാണ്. ഇതാണ് എന്റെ ശക്തിഅവരോടുള്ള എന്റെ സ്‌നേഹം. വികാരങ്ങളെ നിങ്ങള്‍ ഒരു ബലഹീനതയായി കാണുന്നുണ്ടാകാം. എന്നാല്‍ അതിനര്‍ത്ഥം നിങ്ങള്‍ ഒരിക്കലും ആരെയും ആത്മാര്‍ത്ഥമായി സ്‌നേഹിച്ചിട്ടില്ല എന്നല്ലേ? സ്‌നേഹത്തെക്കുറിച്ചോ കരുണയെക്കുറിച്ചോ നിങ്ങള്‍ക്ക് എന്ത് അറിയാം? നിങ്ങള്‍ക്ക് അതിനെക്കുറിച്ച് ഒരു ധാരണയുമില്ലഎല്ലാവരെയും അധിക്ഷേപിച്ചു നടക്കുക എന്നത് മാത്രമാണ് നിങ്ങള്‍ക്ക് അറിയാവുന്നത്.
നിങ്ങള്‍ എല്ലായിടത്തും വിദ്വേഷം പ്രചരിപ്പിക്കുന്നു, അതിനെ നിങ്ങള്‍ കരുത്താണെന്ന് തെറ്റിദ്ധരിക്കുന്നു. നിങ്ങള്‍ ചൊരിയുന്ന അധിക്ഷേപങ്ങളും പ്രചരിപ്പിക്കുന്ന വിദ്വേഷവും കരുത്തല്ല. അത് നിങ്ങളുടെ ഭയത്തിന്റെ പ്രകടനമാണ്. നിങ്ങളുടെ അരക്ഷിതാവസ്ഥയുടെയും ബലഹീനതയുടെയും അടയാളം മാത്രമാണത്. സൗരവും അശുവും ചെയ്യുന്ന ത്യാഗങ്ങളിലാണ് യഥാര്‍ത്ഥ കരുത്ത് അടങ്ങിയിരിക്കുന്നത്. സൗരവിനോടും അശുവിനോടും നമുക്കെല്ലാവര്‍ക്കും ഉള്ള സ്‌നേഹത്തിലാണ് യഥാര്‍ത്ഥ കരുത്ത് ഉള്ളത്. അനുകമ്പയിലാണ് യഥാര്‍ത്ഥ കരുത്ത് കുടികൊള്ളുന്നത്.
സൗരവും അശുവും ഇന്ന് ജയിലിലാണെങ്കിലും, അവരുടെ കുടുംബങ്ങള്‍ നമ്മളോട് പറയുന്നത്, ‘നിങ്ങള്‍ സ്വയം ശ്രദ്ധിക്കുക, ഒപ്പം മുഴുവന്‍ സംഘത്തെയും നോക്കിക്കൊള്ളുക; നിങ്ങള്‍ ഒട്ടും വിഷമിക്കേണ്ട’ എന്നാണ്. അതാണ് അനുകമ്പ.അതാണ് നമ്മുടെ കരുത്ത്. നമ്മുടെ വികാരങ്ങള്‍ നമ്മുടെ ബലഹീനതകളല്ല; അവ നമ്മുടെ കരുത്തുകളാണ്. ഭരണഘടനാ മൂല്യങ്ങളാലും മഹാത്മാഗാന്ധിയുടെ തത്വങ്ങളാലും നയിക്കപ്പെട്ട്, സ്‌നേഹവും അനുകമ്പയും ഹൃദയത്തില്‍ സൂക്ഷിച്ചുകൊണ്ട് നമ്മള്‍ മുന്നോട്ട് പോകും. സമാധാനത്തിലും അഹിംസയിലും അധിഷ്ഠിതമായ അടിത്തറ പാകിയ മഹാത്മാഗാന്ധി മുന്നോട്ടുവെച്ച മൂല്യങ്ങളില്ലാതെ ഇന്ത്യ എന്ന രാജ്യത്തിന് നിലനില്‍ക്കാനാവുമെന്ന് ഞാന്‍ കരുതുന്നില്ല. ഡോ. ബാബാസാഹേബ് അംബേദ്കര്‍ നമുക്ക് നല്‍കിയ ഭരണഘടനയില്‍ ഉള്‍ക്കൊള്ളിച്ചിരിക്കുന്ന മൂല്യങ്ങളും നമ്മള്‍ പിന്തുടരും. അനീതിക്കെതിരെ ശബ്ദമുയര്‍ത്താനും, എവിടെയായിരുന്നാലും അടിച്ചമര്‍ത്തപ്പെട്ടവരെ സംരക്ഷിക്കാനും നമ്മെ പ്രേരിപ്പിക്കുന്ന മൂല്യങ്ങളാണവ.
പ്രധാന വിഷയത്തിലേക്ക് മടങ്ങി വന്നാല്‍, നമുക്ക് ഭയമില്ല, നമ്മള്‍ ഭയപ്പെടുകയുമില്ല. സൗരവിനെയും അശുവിനെയും നമ്മള്‍ സ്‌നേഹിക്കുന്നതുകൊണ്ടാണ് നമുക്ക് വികാരങ്ങള്‍ ഉണ്ടാകുന്നത്. എന്നാല്‍ നിങ്ങള്‍ക്ക് വികാരങ്ങള്‍ ഉണ്ടാകാന്‍ കഴിയില്ലെന്ന് എനിക്കറിയാം; കാരണം നിങ്ങളുടെ ഹൃദയത്തില്‍ മറ്റാരോടും ഒട്ടും സ്‌നേഹമില്ല.ഒരു തരി പോലും സ്‌നേഹമില്ല.അങ്ങനെയൊരു സ്‌നേഹം ഉണ്ടാകാന്‍ നിങ്ങള്‍ക്ക് കഴിയുകയുമില്ല. സൗരവിനോടും അശുവിനോടും നമുക്കുള്ളതുപോലെയുള്ള സ്‌നേഹം മറ്റാരോടും കാണിക്കാന്‍ പലര്‍ക്കും കഴിയില്ലെന്ന് തോന്നുന്നു. ചിലര്‍ സ്വന്തം കുടുംബങ്ങളെപ്പോലും ഉപേക്ഷിച്ചുപോകുന്നു, പിന്നെ എന്തു പറയാനാണ്?
നമ്മള്‍ അങ്ങനെയല്ല. നമ്മള്‍ എപ്പോഴും പരസ്പരം ചേര്‍ന്നുനില്‍ക്കും, എപ്പോഴും പരസ്പരം താങ്ങായി ഉണ്ടാകും. സൗരവും അശുവും തിരിച്ചുവരുന്ന ദിവസം, അവര്‍ പുഞ്ചിരിയോടെയായിരിക്കും മടങ്ങിവരിക എന്ന് എനിക്ക് ഉറപ്പാണ്. സത്യത്തില്‍, അവരുടെ തിരിച്ചുവരവിനായി ഞാന്‍ ആകാംക്ഷയോടെ കാത്തിരിക്കുകയാണ്.
സൗരവ്, അശുതോഷ്… നിങ്ങള്‍ എപ്പോഴെങ്കിലും ഈ വീഡിയോ കാണുകയാണെങ്കില്‍, ഞാന്‍ നിങ്ങളെ ഒരുപാട് മിസ്സ് ചെയ്യുന്നുണ്ടെന്നും ഇപ്പോഴും മിസ്സ് ചെയ്യുന്നുണ്ടെന്നും അറിയുക. ഞങ്ങള്‍ മൂന്നുപേര്‍ക്കുമായി ഒരു പ്രത്യേക വാട്‌സാപ്പ് ഗ്രൂപ്പുണ്ട്, അവിടെ ഞങ്ങള്‍ മീമുകള്‍ പങ്കുവെക്കാറുണ്ട്. കോര്‍ ടീമിലെ മറ്റുള്ളവരോട് ക്ഷമ ചോദിക്കുന്നു! ആ ഗ്രൂപ്പില്‍ സൗരവും അശുതോഷും എപ്പോഴും മീമുകള്‍ പങ്കുവെക്കുമായിരുന്നു. അവര്‍ ഇപ്പോഴും കൂടെയുണ്ടെന്ന് തോന്നാന്‍ വേണ്ടി മാത്രം, ചിലപ്പോഴൊക്കെ ഞാന്‍ ആ ഗ്രൂപ്പ് തുറന്നുനോക്കാറുണ്ട്.
അവര്‍ തിരിച്ചുവരണമെന്ന് ഞാന്‍ ആത്മാര്‍ത്ഥമായി ആഗ്രഹിക്കുന്നു. ഇതൊരു കഠിനമായ പോരാട്ടമാണെന്ന് എനിക്ക് ഉറപ്പാണ്, എങ്കിലും എത്ര പ്രയാസകരമായാലും നമ്മള്‍ അതിനെ നേരിടും. നമ്മള്‍ ഭയപ്പെടില്ല. ശരിയല്ലേ?
നിങ്ങളെയെല്ലാവരെയും എനിക്ക് ഇഷ്ടമാണ്. നിങ്ങള്‍ നല്‍കിയ എല്ലാ പിന്തുണയ്ക്കും സ്‌നേഹത്തിനും നന്ദി, പ്രത്യേകിച്ച് കഴിഞ്ഞ 10 ദിവസങ്ങളായി നിങ്ങള്‍ കടന്നുപോയ എല്ലാ കാര്യങ്ങള്‍ക്കും. സൗരവിന്റെയും അശുവിന്റെയുംപിന്നെ എന്റെയുംകഥകള്‍ വാര്‍ത്തകളില്‍ വരുന്നുണ്ടാകാം. എന്നാല്‍, അവരെപ്പോലെ തന്നെ കഠിനമായി പ്രയത്‌നിച്ച, എന്നാല്‍ കഥകള്‍ പുറംലോകമറിയാത്ത ഒട്ടേറെ വോളന്റിയര്‍മാര്‍ വേറെയുമുണ്ട്. എനിക്കത് നന്നായി അറിയാം. അതുകൊണ്ട്, എല്ലാവരും ദയവായി സ്വന്തം കാര്യങ്ങള്‍ ശ്രദ്ധിക്കുക. കുടുംബത്തോടൊപ്പം സമയം ചെലവഴിക്കുകഅവര്‍ക്ക് താങ്ങായി നില്‍ക്കുക. ആഘോഷങ്ങള്‍ നന്നായി കൊണ്ടാടുക. ഒപ്പം, എന്റെ സഹോദരങ്ങളായ സൗരവിനെയും അശുവിനെയും നിങ്ങളുടെ ഓര്‍മ്മയില്‍ സൂക്ഷിക്കുക. ശരിയല്ലേ? നന്ദി. എല്ലാവര്‍ക്കും സ്‌നേഹം.
Content Highlight: Abhijeet Dipke Message to CJP Supporters
