കൊച്ചി: ഒറ്റയ്ക്ക് താമസിച്ചിരുന്ന വീട്ടമ്മ ശുചിമുറിയില് മരിച്ച നിലയില്. സംഭവം കൊലപാതകമെന്ന് പൊലീസ്. പെരുമ്പാവൂര് സ്വദേശി ജെയ്സി ഏബ്രഹാമിനെ (55) ആണ് കളമശ്ശേരി കൂനംതൈയിലെ അപ്പാര്ട്മെന്റില് മരിച്ച നിലയില് കണ്ടെത്തിയത്. പോസ്റ്റുമോര്ട്ടം റിപ്പോര്ട്ടിലാണ് കൊലപാതകം സ്ഥിരീകരിച്ചത്.
ഇന്നലെ വൈകുന്നേരം ജെയ്സി ഏബ്രഹാമിനെ കളമശ്ശേരിയിലെ അപ്പാര്ട്മെന്റില് മരിച്ച നിലയില് കണ്ടെത്തുകയായിരുന്നു. ജെയ്സിയുടെ കാനഡയില് ജോലിയുള്ള ഏക മകള് അമ്മയെ ഫോണില് വിളിച്ചു കിട്ടാതായപ്പോള് പൊലീസിനെ അറിയിക്കുകയായിരുന്നു. പൊലീസെത്തി വാതില് പൊളിച്ച് അകത്തു കയറിയപ്പോഴാണ് മൃതദേഹം കണ്ടെത്തിയത്.
read also: ചികിത്സ കിട്ടാതെ യുവതി മരിച്ചു: മെഡിക്കല് കോളേജ് ആശുപത്രിയില് മൃതദേഹവുമായി ബന്ധുക്കളുടെ പ്രതിഷേധം
റിയല് എസ്റ്റേറ്റ് വ്യാപാരത്തില് സജീവമായിരുന്നു ജെയ്സി ഏബ്രഹാം. അതുകൊണ്ടു തന്നെ അത്തരത്തിലൊരു തര്ക്കമോ മറ്റോ ഉണ്ടായിരുന്നോ എന്നാണ് പൊലീസ് പരിശോധിക്കുന്നത്.
തലയിൽ ആഴത്തിലുള്ള മുറിവു കണ്ടതോടെ പൊലീസിന് കൊലപാതകമാണോ എന്ന് സംശയമുണ്ടായിരുന്നു. ജെയ്സിയുടെ മൊബൈല് ഫോണ് കണ്ടെത്താനായില്ല. ഇത് കവര്ച്ച ചെയ്യപ്പെട്ടതാണോ എന്നു പൊലീസിനു സംശയമുണ്ട്. കളമശ്ശേരി മെഡിക്കല് കോളേജില് നടത്തിയ പോസ്റ്റുമോര്ട്ടത്തിലാണ് തലക്കേറ്റ ഗുരുതരമായ പരിക്കാണ് മരണകാരണമെന്ന് പൊലീസ് സ്ഥിരീകരിച്ചത്. സംഭവത്തില് പ്രതിയെ കണ്ടെത്തുന്നതിനായി സിസിടിവി കേന്ദ്രീകരിച്ചുള്ള അന്വേഷണത്തിലാണ് പോലീസ്
