ഭോപ്പാൽ: ‘അന്നപൂരണി’ എന്ന സിനിമയ്ക്കെതിരെ രോഷം ഉയരുന്നതിനിടെ, നടി നയൻതാരയ്ക്കെതിരെ കേസെടുത്ത് പോലീസ്. മധ്യപ്രദേശിലെ ജബൽപൂരിൽ ഒരു വലതുപക്ഷ സംഘടന സമർപ്പിച്ച പരാതിയിലാണ് പോലീസ് കേസ് രജിസ്റ്റർ ചെയ്തത്. നയൻതാരയും സംവിധായകനും നിർമാതാവും ഹിന്ദുക്കളുടെ മതവികാരം വ്രണപ്പെടുത്തുകയും ശ്രീരാമനെ അനാദരിക്കുകയും ചെയ്തുവെന്നാണ് പരാതിയിൽ ആരോപിക്കുന്നത്. ഒപ്പം ലവ് ജിഹാദിനെ ഇവർ പ്രോത്സാഹിപ്പിച്ചെന്നും ആരോപണമുണ്ട്.
നയൻതാര, സംവിധായകൻ നിലേഷ് കൃഷ്ണ, നിർമ്മാതാക്കളായ ജതിൻ സേത്തി, ആർ രവീന്ദ്രൻ, നെറ്റ്ഫ്ലിക്സ് ഇന്ത്യയുടെ കണ്ടന്റ് ഹെഡ് മോണിക്ക ഷെർഗിൽ എന്നിവരുൾപ്പെടെ ഏഴ് പേരെയാണ് പ്രതി പട്ടികയിൽ ഉൾപ്പെടുത്തിയത്. ഡിസംബർ 1 ന് തിയേറ്ററുകളിൽ റിലീസ് ചെയ്ത ചിത്രം ഡിസംബർ 29 ന് Netflix-ൽ സ്ട്രീം ചെയ്യാൻ തുടങ്ങി. നിരവധി പോലീസ് പരാതികൾക്ക് പിന്നാലെ ഇപ്പോൾ OTT പ്ലാറ്റ്ഫോമിൽ നിന്ന് ചിത്രം പിൻവലിച്ചിരിക്കുകയാണ്. വലതുപക്ഷ സംഘടനകളായ ബജ്റംഗ്ദളും ഹിന്ദു ഐടി സെല്ലും നയൻതാരയ്ക്കും മറ്റുള്ളവർക്കുമെതിരെ രണ്ട് പരാതികൾ മുംബൈയിലും നൽകിയിട്ടുണ്ട്.
ഹിന്ദു സേവാ പരിഷത്തിന്റെ സ്ഥാപകനും പ്രസിഡന്റുമായ അതുൽ ജെസ്വാനിയുടെ ജബൽപൂർ കേസ്, മതത്തിന്റെയും പൊതു ഉദ്ദേശ്യത്തിന്റെയും അടിസ്ഥാനത്തിൽ ഗ്രൂപ്പുകൾക്കിടയിൽ ശത്രുത വളർത്തുന്നത് സംബന്ധിച്ച ഇന്ത്യൻ ശിക്ഷാ നിയമത്തിലെ വകുപ്പുകൾ പ്രകാരമാണ് കേസ് ഫയൽ ചെയ്തത്. ‘അന്നപൂരണി’ ഹിന്ദു മതവികാരം വ്രണപ്പെടുത്തിയെന്നും സനാതന ധർമ്മത്തെ അപമാനിച്ചെന്നും ശ്രീരാമനെതിരെ അടിസ്ഥാനരഹിതമായ പരാമർശങ്ങൾ നടത്തിയെന്നും ഹിന്ദു സേവാ പരിഷത്ത് നൽകിയ പരാതിയിൽ ആരോപിക്കുന്നു.
ഒരു ക്ഷേത്ര പൂജാരിയുടെ മകളായി അഭിനയിക്കുന്ന നയൻതാര ബിരിയാണി ഉണ്ടാക്കുന്നതിന് മുമ്പ് ഹിജാബ് ധരിച്ച് നമസ്കരിക്കുന്നത് ഉൾപ്പെടെ സിനിമയിലെ ചില രംഗങ്ങളാണ് വിവാദങ്ങൾക്ക് കാരണമായിരിക്കുന്നത്. നയൻതാര അവതരിപ്പിക്കുന്ന കഥാപാത്രത്തിന്റെ സുഹൃത്ത് അവളെ മാംസം മുറിക്കാൻ ശ്രീരാമനും സീത ദേവിയും മാംസം കഴിച്ചിരുന്നുവെന്ന് നുണ പറയുകയും ചെയ്തുവെന്ന് പരാതിയിൽ പറയുന്നു. മുസ്ലീം പുരുഷന്മാർ ഹിന്ദു പെൺകുട്ടികളെയും സ്ത്രീകളെയും മതം മാറ്റാൻ ശ്രമിച്ചുവെന്ന് ആരോപിച്ച് ചില വലതുപക്ഷ സംഘടനകൾ ഉപയോഗിക്കുന്ന ‘ലവ് ജിഹാദ്’ എന്ന പദമാണ് സിനിമ പ്രോത്സാഹിപ്പിക്കുന്നതെന്നും ജെശ്വനി ആരോപിച്ചു.
