തിരുപ്പതി: തിരുപ്പതി വെങ്കിടേശ്വര ക്ഷേത്രത്തില് പ്രസാദമായി നല്കുന്ന ലഡു ഉണ്ടാക്കാന് ഉപയോഗിക്കുന്ന നെയ്യില് മൃഗക്കൊഴുപ്പുണ്ടെന്ന ലാബ് റിപ്പോര്ട്ട് പുറത്തുവന്നതിന് പിന്നാലെ സംഭവത്തില് സമഗ്രമായ അന്വേഷണം വേണമെന്ന് കേന്ദ്ര ഭക്ഷ്യമന്ത്രി പ്രള്ഹാദ് ജോഷി. കുറ്റക്കാര്ക്കെതിരെ നടപടിയെടുക്കുമെന്നും അദ്ദേഹം വ്യക്തമാക്കി. കഴിഞ്ഞ ദിവസമായിരുന്നു ഇതുമായി ബന്ധപ്പെട്ട് ആന്ധ്രാപ്രദേശ് മുഖ്യമന്ത്രി എന് ചന്ദ്രബാബു നായിഡു രംഗത്തെത്തിയത്.
മൃഗക്കൊഴുപ്പും ഗുണനിലവാരമില്ലാത്ത ചേരുവകളും ഉപയോഗിച്ചാണ് പ്രസിദ്ധമായ തിരുപ്പതി ലഡു ഉണ്ടാക്കിയിരുന്നതെന്നും വൈഎസ്ആര് കോണ്ഗ്രസ് നേതാവ് ജഗന് മോഹന് റെഡ്ഡി മുഖ്യമന്ത്രിയായിരുന്നു കാലയളവിലാണ് ഇത്തരത്തില് നെയ്യിന് പകരം മൃഗക്കൊഴുപ്പ് ഉപയോഗിച്ചതെന്നും നായിഡു ആരോപണം ഉന്നയിച്ചിരുന്നു.
ഗുജറാത്തിലെ നാഷണല് ഡയറി ഡെവലപ്മെന്റ് ബോര്ഡിലെ സെന്റര് ഓഫ് അനാലിസിസ് ആന്ഡ് ലേണിംഗ് ഇന് ലൈവ്സ്റ്റോക്ക് ആന്ഡ് ഫുഡ് (CALF) ബുധനാഴ്ച പുറത്തിറക്കിയ റിപ്പോര്ട്ടിലാണ് പ്രസിദ്ധമായ തിരുപ്പതി ലഡു നിര്മ്മിക്കാന് ഉപയോഗിക്കുന്ന നെയ്യില് മൃഗക്കൊഴുപ്പ് കണ്ടെത്തിയതായി അറിയിച്ചത്. ലഡു ഉണ്ടാക്കാന് ഉപയോഗിക്കുന്ന നെയ്യില് പോത്തിന്റെയും പന്നിയുടെയും കൊഴുപ്പും മീന് എണ്ണയും പാമോയിലും അടങ്ങിയിട്ടുണ്ടെന്നാണ് റിപ്പോര്ട്ടുകള് സ്ഥിരീകരിക്കുന്നത്.
