സംസ്ഥാനത്ത് ഇന്നും സ്വർണവിലയിൽ മാറ്റമില്ല. ഒരു പവൻ സ്വർണത്തിന് 46,840 രൂപയും, ഗ്രാമിന് 5,855 രൂപയുമാണ് ഇന്നത്തെ വില നിലവാരം. തുടർച്ചയായ രണ്ടാം ദിവസമാണ് സ്വർണവില മാറ്റമില്ലാതെ തുടരുന്നത്. അതേസമയം, വെള്ളിയാഴ്ച ഇടിവ് രേഖപ്പെടുത്തിയിരുന്നു. ചരിത്രത്തിലെ ഏറ്റവും ഉയർന്ന നിരക്കിൽ നിന്നാണ് അന്ന് വില കുറഞ്ഞത്. വെള്ളിയാഴ്ച ഒരു പവൻ സ്വർണത്തിന് 280 രൂപ കുറഞ്ഞ് 46,840 രൂപയായി മാറി.
ഡിസംബർ 28 വ്യാഴാഴ്ച കേരളത്തിലെ ചരിത്രത്തിലെ ഏറ്റവും ഉയർന്ന നിരക്കിലാണ് സ്വർണത്തിന്റെ വ്യാപാരം നടന്നത്. അന്ന് ഒരു പവൻ സ്വർണത്തിന്റെ വിപണി വില 47,120 രൂപയായിരുന്നു. ഡിസംബർ നാലിന് രേഖപ്പെടുത്തിയ ഒരു പവന് 47,080 രൂപയും, ഗ്രാമിന് 5,885 രൂപയുമാണ് സംസ്ഥാനത്തിന്റെ ചരിത്രത്തിലെ രണ്ടാമത്തെ ഉയർന്ന നിലവാരം. നിലവിൽ, അന്താരാഷ്ട്ര വിപണിയിൽ സ്വർണവില താഴ്ചയിലാണ് വ്യാപാരം ക്ലോസ് ചെയ്തിരിക്കുന്നത്. ട്രോയ് ഔൺസിന് 4.06 ഡോളർ താഴ്ന്ന്, 2062.9 ഡോളർ എന്നതാണ് നിലവാരം.
