കഴിഞ്ഞ മൂന്ന് ദശകത്തിലേറെയായി തെന്നിന്ത്യയിലെ മുൻനിര നായിക നടിയായി തിളങ്ങുകയാണ് മീന. തെന്നിന്ത്യൻ സിനിമ പ്രേമികളുടെ പ്രിയപ്പെട്ട നടിയാണ് മീന. അടുത്തിടെയാണ് സിനിമ ലോകത്തെ കണ്ണീരിലാഴ്ത്തി മീനയുടെ ഭർത്താവ് വിദ്യാസാഗർ മരിച്ചത്. ശ്വാസകോശ രോഗിയായ വിദ്യാസാഗർ അവയവമാറ്റ ശസ്ത്രക്രിയയ്ക്ക് കാത്തുനിൽക്കെയായിരുന്നു മരണത്തിന് കീഴടങ്ങിയത്. പിന്നാലെ മീന രണ്ടാം വിഭാഗത്തിന് ഒരുങ്ങുന്നുവെന്ന തരത്തിലും അഭ്യൂഹങ്ങൾ പ്രചരിച്ചിരുന്നു. തമിഴിൽ നിന്നും നടൻ ധനുഷിനെ മീന വിവാഹം കഴിച്ചേക്കുമെന്ന് നടൻ ബെയിൽവാൻ രംഗനാഥൻ നടത്തിയ പ്രസ്താവന വിവാദങ്ങൾക്ക് ഇടയാക്കിയിരുന്നു.
അടുത്തിടെയാണ് സിനിമാ രംഗത്തെ മീനയുടെ 40 വർഷങ്ങളുടെ ആഘോഷം നടന്നത്. നടൻ രജിനികാന്ത് ഉൾപ്പെയുള്ളവർ പരിപാടിയിൽ മീനയെ ആദരിക്കാനെത്തി. കലാമാസ്റ്റർ, രാധിക, റോജ, സുഹാസിനി, ശരത്കുമാർ തുടങ്ങി നിരവധി താരങ്ങൾ ചടങ്ങിൽ പങ്കെടുത്തു. മീനയ്‌ക്കൊപ്പമുള്ള നിമിഷങ്ങളെക്കുറിച്ച് പലരും മനസ് തുറന്നിരുന്നു. മീനയുടെ മകൾ നൈനിക വിദ്യാസാഗറും അമ്മയെക്കുറിച്ച് സംസാരിച്ചു. നൈനികയുടെ വാക്കുകൾ കേട്ടിരുന്നവരുടെ ഹൃദയത്തിലേക്കാണ് അത് പതിച്ചത്. പലരും കണ്ണീരണിയുകയും ചെയ്തു. തന്റെ അമ്മയെക്കുറിച്ച് വരുന്ന വ്യാജ വാർത്തകളെക്കുറിച്ചുമൊക്കെ നൈനിക സംസാരിച്ചു. മീന അറിയാതെ ഡാൻസ് മാസ്റ്റർ കലാ മാസ്റ്ററുടെ സഹായത്തോടെയാണ് നൈനിക അമ്മയെക്കുറിച്ച് പറയുന്ന വീഡിയോ തയാറാക്കിയത്.
‘അമ്മ വളരെയധികം വർക്ക് ചെയ്യും. എന്നാൽ വീട്ടിൽ വന്നാൽ അവർ എന്റെ അമ്മയാണ്. എന്റെ അച്ഛൻ മരിച്ച സമയത്ത് അമ്മ വളരെ ഡിപ്രസ്ഡ് ആയിരുന്നു. എന്റെ മുന്നിൽ നിരവധി തവണ കരഞ്ഞു. ഞാൻ ആശ്വസിപ്പിച്ചു. കുട്ടിയായിരിക്കുമ്പോൾ അമ്മ എന്നെ നോക്കി. ഇനി ഞാൻ അമ്മയെ നോക്കും. നിരവധി ന്യൂസ് ചാനലുകൾ എന്റെ അമ്മയെ പറ്റി വ്യാജ വാർത്ത എഴുതിയിട്ടുണ്ട്. അമ്മ രണ്ടാമതും ഗർഭിണിയായിരുന്നെന്നാണ് ഒരു ചാനൽ പറഞ്ഞത്. എനിക്കത് തമാശയായി തോന്നി. എന്നാൽ ഇത്തരം നിരവധി വാർത്തകൾ വന്നതോടെ എനിക്കത് ഇഷ്ടമല്ലാതായി. എന്നെയോർത്ത് നിർത്തൂ. അമ്മ ഒരു നായികയായിരിക്കും. പക്ഷെ അമ്മയും ഒരു മനുഷ്യനാണ്. ആരെങ്കിലും നിങ്ങളോട് ഇങ്ങനെ ചെയ്താൽ വിഷമിക്കില്ലേ,’ എന്ന് ചോദിക്കുകയായിരുന്നു നൈനിക.
മകളുടെ വാക്കുകൾ കേട്ട് മീന വികാരഭരിതയായി. മകളോടൊപ്പം വേദിയിൽ വന്ന് ഇതേപറ്റി സംസാരിക്കുകയും ചെയ്തു. അച്ഛനെപ്പോലെ വൈകാരികമായി പ്രകടിപ്പിക്കുന്ന ആളല്ല മകൾ. പക്ഷെ കാര്യങ്ങൾ അവളിത്ര ആഴത്തിൽ മനസ്സിലാക്കിയിരുന്നെന്ന് അറിഞ്ഞതിൽ ആശ്ചര്യമെന്ന് മീന വ്യക്തമാക്കി.
തെറി എന്ന സിനിമയിൽ ബാല താരമായെത്തി പ്രേക്ഷക ഹൃദയം കരസ്ഥമാക്കിയ കുട്ടിത്താരമാണ് നൈനിക. ജീവിതത്തിലുണ്ടായ അവിചാരിത സംഭവത്തിൽ മീനയെ ചേർത്ത് പിടിക്കാൻ തമിഴകത്തെ താരങ്ങളെത്തി എന്നത് ശ്രദ്ധേയമാണ്.
