മലപ്പുറം: കരിപ്പൂർ വിമാനത്താവളത്തില് വന് സ്വര്ണ്ണ വേട്ട. ഒന്നേകാല് കോടി രൂപ വിലവരുന്ന സ്വര്ണ്ണം ഒളിപ്പിച്ചു കൊണ്ടുവന്ന ദമ്പതികള് കസ്റ്റംസ് പിടിയില്. മലപ്പുറം വഴിക്കടവ് സ്വദേശികളായ അമീര് മോൻ, സഫ്ന എന്നിവരാണ് പിടിയിലായത്. കഴിഞ്ഞ ദിവസം രാത്രി ജിദ്ദയിൽനിന്നും എയർ ഇന്ത്യ എക്സ്പ്രസ് വിമാനത്തിലാണ് ദമ്പതികള് കരിപ്പൂർ വിമാനത്താവളത്തിലെത്തിയത്.
ദമ്പതികള്ക്കൊപ്പം ഇവരുടെ കുട്ടിയും കൂടെ ഉണ്ടായിരുന്നു. എന്നാല്, സഫ്നയുടെ പെരുമാറ്റത്തിൽ സംശയം തോന്നി കസ്റ്റംസ് ഉദ്യോഗസ്ഥർ പരിശോധിക്കുകയായിരുന്നു. സഫ്നയുടെ പക്കല് നിന്നും 1104 ഗ്രാം സ്വര്ണ്ണ മിശ്രിതം കണ്ടെത്തി. അടി വസ്ത്രത്തില് ഒളിപ്പിച്ച നിലയിലായിരുന്നു സ്വര്ണ്ണം.
രണ്ട് പേരില് നിന്നും പിടികൂടിയ സ്വർണ്ണമിശ്രിതത്തിൽ നിന്നും 24 കാരറ്റ് പരിശുദ്ധിയുള്ള 2055 ഗ്രാം സ്വർണം വേർതിരിച്ചെടുത്തു. കള്ളക്കടത്ത് സംഘം ഇരുവര്ക്കും 50,000 രൂപ വീതമാണ് പ്രതിഫലമായി വാഗ്ദാനം ചെയ്തിരുന്നതെന്ന് കസ്റ്റംസ് ഉദ്യോഗസ്ഥര് വ്യക്തമാക്കി. ദമ്പതികളുടെ അറസ്റ്റ് ഉള്പ്പെടെയുള്ള നടപടികള് ഉടന് സ്വീകരിക്കുമെന്ന് കസ്റ്റംസ് അറിയിച്ചു.
