ഫലസ്തീനൊപ്പം തന്നെയെന്ന് വീണ്ടും ഉറക്കെ പ്രഖ്യാപിച്ച് മലേഷ്യ: ഇസ്രഈലിലേക്കുള്ള ചരക്ക് കണ്ടെയ്നര് കണ്ടുകെട്ടി
ക്വാലാലംപൂര്: ഗസയിലെ അധിനിവേശത്തിലും വംശഹത്യയിലും പ്രതിഷേധിച്ച് ഇസ്രഈലിനെതിരെയുള്ള ഉപരോധം കൂടുതല് കടുപ്പിച്ച് മലേഷ്യ. ഇസ്രഈലിലേക്ക് ഉത്പന്നങ്ങള് കയറ്റി അയക്കാന് ശ്രമിച്ച ചരക്കുകപ്പലിലെ കണ്ടെയ്നര് മലേഷ്യന് ബോര്ഡര് കണ്ട്രോള് ആന്ഡ് പ്രൊട്ടക്ഷന് ഏജന്സി (എ.കെ.പി.എസ്) പിടിച്ചെടുത്തു.
ജോഹോറിലെ തഞ്ചുങ് പെലെപാസ് തുറമുഖത്ത് (Port of Tanjung Pelepas) നിന്നാണ് രഹസ്യ വിവരത്തെ തുടര്ന്ന് നടത്തിയ പരിശോധനയില് വിദേശ കപ്പലിലെ വിതരണ പെട്ടി പിടിച്ചെടുത്തത്.
മലേഷ്യന് കസ്റ്റംസ് നിയമത്തിലെ (2023) വകുപ്പ് 15 പ്രകാരം ഇസ്രഈലിലേക്ക് നേരിട്ടോ അല്ലാതെയോ ചരക്കുകള് കയറ്റി അയക്കുന്നത് പൂര്ണമായും നിരോധിച്ചിട്ടുണ്ട്.
ഇസ്രഈലിന് സാങ്കേതികമായോ സൈനികമായോ സഹായകരമാകുന്ന യുദ്ധോപകരണങ്ങളോ തന്ത്രപ്രധാന വസ്തുക്കളോ ആണോ ഇവയെന്ന് മലേഷ്യന് സ്ട്രാറ്റജിക് ട്രേഡ് ആക്ട് (2010) പ്രകാരം അധികൃതര് വിശദമായി പരിശോധിച്ചു വരികയാണ്.
സെന്സിറ്റീവ് ചരക്കുകള് ഇസ്രഈലിലേക്ക് കടത്താനുള്ള ശ്രമം തടഞ്ഞ അതിര്ത്തി സംരക്ഷണ ഏജന്സി അധികൃതരെ മലേഷ്യന് പ്രധാനമന്ത്രി അന്വര് ഇബ്രാഹിം അഭിനന്ദിച്ചു.
ഗസയിലെ നിരപരാധികളായ ഫലസ്തീനികള്ക്കെതിരെ ഇസ്രഈല് നടത്തുന്ന ക്രൂരമായ അതിക്രമങ്ങള്ക്ക് മലേഷ്യയുടെ മണ്ണ് അല്പം പോലും ഒരു സഹായവും ചെയ്യില്ലെന്നും അദ്ദേഹം ഒരിക്കല്ക്കൂടി പ്രഖ്യാപിച്ചു.
ഇസ്രഈലിലേക്ക് പോകുന്ന കപ്പലുകള്ക്ക് മലേഷ്യന് തുറമുഖങ്ങളില് ചരക്ക് കയറ്റാനോ ഇറക്കാനോ ഉള്ള അനുമതി 2023 ഡിസംബറില് തന്നെ സര്ക്കാര് പൂര്ണമായി നിരോധിച്ചിരുന്നു. ഇസ്രഈലിന്റെ മുന്നിര ഷിപ്പിങ് കമ്പനിയായ സിം ഉള്പ്പെടെയുള്ള കപ്പലുകള്ക്ക് രാജ്യത്ത് വിലക്കേര്പ്പെടുത്തിയിട്ടുണ്ട്.
ദി ഹേഗ് ഗ്രൂപ്പ് കൂട്ടായ്മയിലെ സ്ഥാപക അംഗമെന്ന നിലയില് ഇസ്രഈലിലേക്ക് സൈനിക അല്ലെങ്കില് തന്ത്രപ്രധാന സാമഗ്രികള് എത്തുന്നില്ലെന്ന് ഉറപ്പുവരുത്താന് അന്താരാഷ്ട്ര തലത്തിലും മലേഷ്യ മുന്പന്തിയിലുണ്ട്.
ഫലസ്തീന് ജനതയ്ക്കൊപ്പം ഉറച്ചുനില്ക്കുമെന്നും ഇസ്രഈലിന്റെ ക്രൂരതകള്ക്കെതിരെ സാധ്യമായ എല്ലാ നടപടികളും തുടരുമെന്നും മലേഷ്യന് ഭരണകൂടം വ്യക്തമാക്കി.
Content highlight: Malaysia’s border agency has seized a shipping container suspected of carrying Israel-bound cargo.
