ന്യൂദൽഹി: കേന്ദ്ര ആഭ്യന്തര മന്ത്രി അമിത് ഷായ്‌ക്കെതിരെ ആക്ഷേപകരമായ പരാമർശം നടത്തിയെന്നാരോപിച്ച് ലോക്‌സഭാ പ്രതിപക്ഷ നേതാവും കോൺഗ്രസ് എം.പിയുമായ രാഹുൽ ഗാന്ധിക്കെതിരെ നിലനിന്നിരുന്ന 2018-ലെ ക്രിമിനൽ മാനനഷ്ടക്കേസ് തള്ളി സുൽത്താൻപൂർ കോടതി.
2018-ൽ നടന്ന കർണാടക നിയമസഭാ തെരഞ്ഞെടുപ്പ് പ്രചാരണത്തിന്റെ ഭാഗമായി ബെംഗളൂരുവിൽ സംഘടിപ്പിച്ച വാർത്താസമ്മേളനത്തിലും റാലിയിലുമായിരുന്നു കേസിനാസ്പദമായ സംഭവം.
അന്ന് ബി.ജെ.പി ദേശീയ അധ്യക്ഷനായിരുന്ന അമിത് ഷായെ ലക്ഷ്യമിട്ട് രാഹുൽ ഗാന്ധി അധിക്ഷേപകരമായ പരാമർശം നടത്തിയെന്നാണ് പരാതി ഉയർന്നത്.
2018 മെയ് മാസത്തിലാണ് ഈ കേസിനാസ്പദമായ സംഭവം നടക്കുന്നത്. ‘ബി.ജെ.പി അധ്യക്ഷൻ കൊലക്കേസ് പ്രതിയാണെന്ന കാര്യം ഇന്ത്യയിലെ ജനങ്ങൾ മറക്കുന്നു. സത്യസന്ധതയെയും മാന്യതയെയും കുറിച്ച് സംസാരിക്കുന്ന പാർട്ടിയുടെ അധ്യക്ഷൻ കൊലക്കുറ്റത്തിന് പ്രതി ചേർക്കപ്പെട്ട ആളാണ്’ എന്നതായിരുന്നു രാഹുൽഗാന്ധി അമിത്ഷായ്ക്കെതിരെ നടത്തിയ പരാമർശം.
ഈ പരാമർശത്തിനെതിരെ പ്രാദേശിക ബി.ജെ.പി നേതാവും സുൽത്താൻപൂർ ജില്ലാ സഹകരണ ബാങ്ക് മുൻ ചെയർമാനുമായ വിജയ് മിശ്രയാണ് 2018 ഓഗസ്റ്റ് നാലിന് സുൽത്താൻപൂർ കോടതിയിൽ ക്രിമിനൽ മാനനഷ്ടക്കേസ് ഫയൽ ചെയ്തത്.
തുടർന്ന് വർഷങ്ങളോളം കേസിന്റെ നിയമനടപടികൾ പുരോഗമിക്കുകയും, 2023-ൽ രാഹുൽ ഗാന്ധി നേരിട്ട് കോടതിയിൽ ഹാജരായി ജാമ്യം നേടുകയും ചെയ്തിരുന്നു. തുടർവാദങ്ങൾക്കൊടുവിലാണ് കേസ് പൂർണമായും തള്ളിക്കൊണ്ട് കോടതി ഇപ്പോൾ ഉത്തരവിറക്കിയിരിക്കുന്നത്.
Content Highlight:Remarks against Amit Shah: Rahul Gandhi acquitted in 2018 defamation case.
