തിരുവനന്തപുരം: സൈബർ ഇടങ്ങളിലെ കുറ്റകൃത്യങ്ങൾ തടയുന്നതിനും ഉത്തരവാദിത്വപൂർണമായ ഡിജിറ്റൽ സംസ്കാരം പ്രോത്സാഹിപ്പിക്കുന്നതിനുമായി സംസ്ഥാനത്ത് ‘സൈബർ സേഫ് കേരള’ എന്ന പേരിൽ സമഗ്ര പദ്ധതി നടപ്പാക്കുന്നു. നിയമസഭയിലാണ് ആഭ്യന്തര വകുപ്പ് മന്ത്രി രമേശ് ചെന്നിത്തല ഇക്കാര്യം അറിയിച്ചത്.
ആർട്ടിഫിഷ്യൽ ഇൻ്റലിജൻസ് ദുരുപയോഗം ചെയ്തുകൊണ്ടുള്ള കുറ്റകൃത്യങ്ങൾ വർധിച്ചുവരുന്ന സാഹചര്യത്തിൽ പൊലീസിന്റെ സൈബർ വിഭാഗം അതീവ ജാഗ്രതയോടെയാണ് ഇതിനെ കൈകാര്യം ചെയ്യുന്നതെന്ന് മന്ത്രി വ്യക്തമാക്കി.
കുടുംബകലഹങ്ങൾ ഉണ്ടാക്കൽ, വ്യക്തിവിദ്വേഷം പ്രചരിപ്പിക്കൽ, സമൂഹത്തിൽ മതസ്പർദ്ധ വളർത്തൽ തുടങ്ങിയ നിരവധി കുറ്റകൃത്യങ്ങളാണ് ഇന്ന് സൈബർ ലോകത്ത് നടക്കുന്നത്. സമൂഹത്തിന്റെ സമാധാനപരമായ സഹവർത്തിത്വവും പുരോഗതിയും ഉറപ്പാക്കുകയാണ് ഈ പദ്ധതിയിലൂടെ ലക്ഷ്യമിടുന്നതെന്ന് അദ്ദേഹം പറഞ്ഞു.
വിവിധ മേഖലകളിലെ വിദഗ്ദ്ധരുമായി ചർച്ച നടത്തിയാണ് പദ്ധതിക്ക് രൂപം നൽകിയിട്ടുള്ളത്. പൊലീസ് ഡിപ്പാർട്ട്മെന്റിന്റെ നേതൃത്വത്തിൽ തുടക്കം കുറിച്ച ഈ പദ്ധതി വരും ദിവസങ്ങളിൽ കൂടുതൽ വിപുലമാക്കും എന്ന് മന്ത്രി പറഞ്ഞു.
ഇതുകൂടാതെ, ജനങ്ങളിൽ ഡിജിറ്റൽ അവബോധം വളർത്തുന്നതിന് ആവശ്യമായ കർശന നടപടികൾ സ്വീകരിക്കുമെന്നും, നിർമ്മിത ബുദ്ധിയുടെ കാലഘട്ടത്തിൽ സൈബർ സാക്ഷരത സ്കൂൾ പാഠ്യപദ്ധതിയിൽ ഉൾപ്പെടുത്തുന്ന കാര്യവും സർക്കാരിന്റെ സജീവ പരിഗണനയിലാണെന്നും മന്ത്രി സഭയിൽ അറിയിച്ചു.
Content Highlight:Home Department launches ‘Cyber Safe Kerala’ initiative to prevent cybercrimes.
