ന്യൂഡല്ഹി: പൗരത്വ നിയമഭേദഗതി ലോക്സഭ തെരഞ്ഞെടുപ്പിന് മുമ്പ് നടപ്പാക്കുമെന്ന് കേന്ദ്ര സര്ക്കാര്. ഇതിനുള്ള ചട്ടങ്ങള് വൈകാതെ പ്രസിദ്ധീകരിക്കുമെന്നാണ് കേന്ദ്ര സര്ക്കാര് വൃത്തങ്ങള് അറിയിക്കുന്നത്. പൗരത്വത്തിന് അപേക്ഷിക്കാന് ഓണ്ലൈന് പോര്ട്ടല് നിലവില് വരും.
ഓണ്ലൈന് പോര്ട്ടല് വഴി 2014 ഡിസംബര് 31നോ അതിന് മുന്പോ അഫ്ഗാനിസ്ഥാന്, ബംഗ്ലാദേശ്, പാകിസ്ഥാന് എന്നിവിടങ്ങളില് നിന്ന് ഇന്ത്യയിലെത്തിയ ഹിന്ദു, ക്രിസത്യന്, സിഖ്, പാഴ്സി, ജയിന്, ബുദ്ധിസ്റ്റ് വിഭാഗങ്ങള്ക്ക് ഇന്ത്യന് പൗരത്വത്തിനായി അപേക്ഷിക്കാം. രേഖകള് കേന്ദ്രം നിയോഗിക്കുന്ന സമിതി തന്നെ പരിശോധിച്ച് പൗരത്വം നല്കുന്നതില് തീരുമാനമെടുക്കും. കേരളം, പശ്ചിമബംഗാള്, പഞ്ചാബ്, രാജസ്ഥാന്, ഛത്തീസ് ഘട്ട് , ബിഹാര് എന്നീ സംസ്ഥാനങ്ങള് പൗരത്വ നിയമഭേദഗതിയില് നേരത്തെ തന്നെ എതിര്പ്പറിയിച്ചിരുന്നു.
2019 ഡിസംബര് 11നാണ് പൗരത്വ നിയമ ഭേദഗതി പാര്ലമെന്റ് പാസാക്കിയത്. പാകിസ്ഥാന്, ബംഗ്ലാദേശ്, അഫ്ഗാനിസ്ഥാന് എന്നീ രാജ്യങ്ങളില് നിന്ന് 2014 ഡിസംബര് 31 നോ അതിന് മുമ്പോ ഇന്ത്യയിലേക്ക് കുടിയേറിയ ഹിന്ദു, സിഖ്, ബുദ്ധിസ്റ്റ്, ജെയ്ന്, പാഴ്സി, ക്രിസ്ത്യന് മത വിഭാഗങ്ങളില് പെട്ടവര്ക്ക് ഇന്ത്യന് പൗരത്വം നല്കുന്നതാണ് പുതിയ പൗരത്വ നിയമ ഭേദഗതി. അതേസമയം, മുസ്ലിം വിഭാഗങ്ങളെ പരിഗണിക്കില്ല. 2020ജനുവരി 10 ന് നിയമം നടപ്പാക്കിക്കൊണ്ടുള്ള വിജ്ഞാപനവും കേന്ദ്ര സര്ക്കാര് പുറത്തിറക്കിയിരുന്നു. മുസ്ലിം വിഭാഗത്തെ ഒഴിവാക്കിയതിലെ പ്രക്ഷോഭം രാജ്യവ്യാപകമായി കടുത്തതോടെ നടപടികളില് നിന്ന് തല്ക്കാലത്തേക്ക് കേന്ദ്രസര്ക്കാര് പിന്മാറിയിരുന്നു. ബില് പാസാക്കിയെങ്കിലും ചട്ടങ്ങള് വിജ്ഞാപനം ചെയ്യുന്ന നടപടികള് പൂര്ത്തിയായിരുന്നില്ല.
