സിയോൾ: തകരാറുള്ള ഘടകങ്ങൾ കാരണം ഹ്യുണ്ടായ് മോട്ടോർ, കിയ, മെഴ്സിഡസ്-ബെൻസ് കൊറിയ, ടെസ്ല കൊറിയ എന്നിവയുൾപ്പെടെ നാല് കമ്പനികൾ 11 വ്യത്യസ്ത മോഡലുകളുടെ 343,250 യൂണിറ്റുകൾ ഒരുമിച്ച് തിരിച്ചുവിളിക്കുന്നതായി ഗതാഗത മന്ത്രാലയം വ്യാഴാഴ്ച അറിയിച്ചു.
ബാറ്ററി സെൻസറിലെ ഡിസൈൻ പിശക് കാരണം പോർട്ടർ II ഇലക്ട്രിക് ഉൾപ്പെടെ രണ്ട് മോഡലുകളുടെ 141,125 യൂണിറ്റുകൾ ഹ്യുണ്ടായ് മോട്ടോർ തിരിച്ചുവിളിക്കും. കൂടാതെ, എമർജൻസി ലൈറ്റ് സ്വിച്ചിലെ തകരാറ് മൂലം നെക്സോയുടെ 19,830 യൂണിറ്റുകൾ തിരിച്ചുവിളിക്കുമെന്ന് യോൻഹാപ്പ് വാർത്താ ഏജൻസി റിപ്പോർട്ട് ചെയ്തു. കിയയുടെ സോറെന്റോ ഹൈബ്രിഡും 89,598 യൂണിറ്റുകൾ ഉൾപ്പെടുന്ന മറ്റൊരു മോഡലും സോഫ്റ്റ്വെയർ പിശക് കാരണം തിരുത്തൽ നടപടികൾക്ക് വിധേയമാക്കും.
എഞ്ചിൻ കൺട്രോൾ യൂണിറ്റ് സോഫ്റ്റ്വെയറിലെ പ്രശ്നത്തെ തുടർന്ന് മെഴ്സിഡസ്-ബെൻസ് കൊറിയ നിലവിൽ S580 4MATIC ഉൾപ്പെടെ രണ്ട് വ്യത്യസ്ത മോഡലുകളുടെ 4,068 യൂണിറ്റുകളാണ് തിരിച്ചുവിളിക്കുന്നത്. സോഫ്റ്റ്വെയർ പിശകിനെത്തുടർന്ന് ടെസ്ല കൊറിയ മോഡൽ Y യുടെ 2,425 യൂണിറ്റുകളും മറ്റൊരു മോഡലും തിരിച്ചുവിളിക്കുമെന്നാണ് അറിയിച്ചിരിക്കുന്നത്.
അതേ സമയം ദക്ഷിണ കൊറിയയിലെ വാഹന നിർമ്മാതാക്കൾ കഴിഞ്ഞ വർഷം സ്വമേധയാ തിരിച്ചുവിളിച്ച വാഹനങ്ങളുടെ എണ്ണം എക്കാലത്തെയും ഉയർന്ന നിലയിലെത്തി. കഴിഞ്ഞ വർഷം 1,684 വ്യത്യസ്ത മോഡലുകളിലായി ആകെ 5.12 ദശലക്ഷം യൂണിറ്റുകൾ തകരാറുകൾ കാരണം തിരിച്ചുവിളിക്കപ്പെട്ടതായി കൊറിയ റോഡ് ട്രാഫിക് അതോറിറ്റി അറിയിച്ചു. ഇതിൽ ഏകദേശം 80 ശതമാനത്തോളം ആഭ്യന്തര ഭീമനായ ഹ്യുണ്ടായ് മോട്ടോർ ഗ്രൂപ്പിന്റേതാണ്.
