എറണാകുളം: കേസുമായി ബന്ധപ്പെട്ട് പോലീസ് സ്റ്റേഷൻ വളപ്പിൽ സൂക്ഷിച്ചിരുന്ന കാര് തട്ടിക്കൊണ്ടുപോകാൻ ശ്രമം. മലപ്പുറം തിരുന്നാവായ സ്വദേശി സിറാജുദ്ദീനാണ് അങ്കമാലി പൊലീസ് സ്റ്റേഷൻ വളപ്പില് നിന്ന് ഇന്നോവ കാര് കടത്തിക്കൊണ്ടുപോകാൻ ശ്രമിച്ചത്. സ്പെയർ കീ ഉപയോഗിച്ച് കാര് കടത്തിക്കൊണ്ടുപോയ ആളെ കിലോമീറ്ററുകളോളം പിന്തുടർന്ന് പൊലീസ് പിടികൂടി.
read also: അട്ടപ്പാടിയില് ഏഴ് മാസം പ്രായമുള്ള കുഞ്ഞ് മരിച്ചു: ആരോഗ്യവകുപ്പിന്റെ വീഴ്ചയെന്ന് ആക്ഷേപം
ഇന്നലെ രാത്രി പത്ത് മണിയോടെ വാഹനവുമായി ഇയാൾ സ്റ്റേഷൻ വളപ്പിൽ നിന്നും പുറത്ത് കടന്നത്. കേസ് തീർന്ന് വാഹനം കൊണ്ടുപോകുകയാണെന്നാണ് ഇയാൾ അവിടെക്കണ്ട പോലീസുദ്യോഗസ്ഥനോട് പറഞ്ഞത്. സംശയം തോന്നി തടയാൻ ശ്രമിച്ച ഉദ്യോഗസ്ഥനെ മറികടന്ന് വാഹനം പുറത്തേക്ക് ഓടിച്ചു കൊണ്ടുപോയി. തുടർന്ന് പൊലീസ് ഇയാളെ പിന്തുടരുകയും പുതുക്കാട് പൊലീസിന്റെ സഹായത്തോടെ കസ്റ്റഡിയിലെടുക്കുകയും ചെയ്തു. ഈ മാസം 13 ന് എം.സി റോഡിൽ തമിഴ്നാട് സ്വദേശികളുമായുണ്ടായ തർക്കത്തെ തുടർന്നാണ് ഇന്നോവ കാര് പൊലീസ് സ്റ്റേഷനിലേക്ക് കൊണ്ടു വന്നത്.
