ക്ഷമ ചോദിക്കാനില്ല, കര്‍ണാടകയില്‍ താത്ക്കാലികമായി സിനിമ റിലീസ് ചെയ്യില്ല; തഗ്ഗ് ലൈഫ് വിവാദത്തില്‍ കമല്‍ഹാസന്‍ കര്‍ണാടക ഹൈക്കോടതിയില്‍

ക്ഷമ ചോദിക്കാനില്ല, കര്‍ണാടകയില്‍ താത്ക്കാലികമായി സിനിമ റിലീസ് ചെയ്യില്ല; തഗ്ഗ് ലൈഫ് വിവാദത്തില്‍ കമല്‍ഹാസന്‍ കര്‍ണാടക ഹൈക്കോടതിയില്‍

ചെന്നൈ: കന്നഡ ഭാഷ തമിഴില്‍ നിന്നുണ്ടായതാണെന്ന പരാമര്‍ശത്തിന് പിന്നാലെ ഉണ്ടായ വിവാദത്തില്‍ വിശദീകരണം നല്‍കി കമല്‍ഹാസന്‍. വിവാദങ്ങള്‍ക്കിടെ തന്റെ പുതിയ സിനിമയായ തഗ്ഗ് ലൈഫ് കര്‍ണാടകയില്‍ താത്ക്കാലികമായി റിലീസ് ചെയ്യില്ലെന്ന് അദ്ദേഹം ഹൈക്കോടതിയെ അറിയിച്ചു.

താന്‍ ക്ഷമ ചോദിക്കാനില്ലെന്നും ഫിലിം ചേംബര്‍ ഓഫ് കൊമേഴ്‌സുമായി ചര്‍ച്ച നടത്തുന്നതുവരെ സംസ്ഥാനത്ത് സിനിമ റിലീസ് നിര്‍ത്തിവെക്കാന്‍ തീരുമാനിച്ചിട്ടുണ്ടെന്നും കമല്‍ഹാസന്റെ അഭിഭാഷകന്‍ ധ്യാന്‍ ചിന്നപ്പ ജസ്റ്റിസ് എം. നാഗപ്രസന്നയുടെ ബെഞ്ചിനെ അറിയിച്ചു.

ഭാഷ വിവാദത്തിന് പിന്നാലെ തന്റെ പുതിയ ചിത്രം തഗ് ലൈഫിന് കര്‍ണാടകയില്‍ വിലക്ക് ഏര്‍പ്പെടുത്തിയ നടപടിക്കെതിരെ നിയമനടപടിയുമായി കമല്‍ ഹാസന്‍ ഹൈക്കോടതിയെ സമീപിച്ചിരുന്നു. ഇതിനെ തുടര്‍ന്ന് കമല്‍ ഹാസനെ കോടതി വിമര്‍ശിക്കുകയും ചെയ്തിരുന്നു. ഇതിന് പിന്നാലെയാണ് കമല്‍ഹാസന്‍ വിശദീകരണം നല്‍കിയത്.

തമിഴില്‍ നിന്നാണ് കന്നഡ ഉത്ഭവിച്ചതെന്ന പരാമര്‍ശത്തില്‍ കമല്‍ ഹാസന്‍ മാപ്പ് പറയണമെന്ന് കര്‍ണാടക ഹൈക്കോടതി ചൊവ്വാഴ്ച്ച വ്യക്തമാക്കിയിരുന്നു. കമല്‍ ഹാസന്റെ പരാമര്‍ശം കന്നഡക്കാരുടെ വികാരത്തെ വ്രണപ്പെടുത്തിയെന്നും സ്ഥിതിഗതികള്‍ ശാന്തമാക്കാന്‍ താരം ക്ഷമാപണം നടത്തണമെന്നും സിംഗിള്‍ ജഡ്ജി ജസ്റ്റിസ് എം. നാഗപ്രസന്ന പറഞ്ഞിരുന്നു.

ഒരു പൗരന്റെയും വികാരങ്ങളെ വ്രണപ്പെടുത്താന്‍ ആര്‍ക്കും അവകാശമില്ലെന്ന് നിരീക്ഷിച്ച കോടതി ഇത്തരമൊരു പ്രസ്താവന നടത്താന്‍ കമല്‍ ഹാസന്‍ ഒരു ചരിത്രകാരനാണോ അതോ ഭാഷാശാസ്ത്രജ്ഞനാണോ എന്നും ചോദിക്കുകയുണ്ടായി.

പിന്നാലെ ഭാഷ വിവാദത്തില്‍ കമല്‍ ഹാസന്‍ മാപ്പ് പറയണമെന്ന് നിലപാട് കര്‍ണാടക ഫിലിം ചേംബര്‍ ഓഫ് കോമേഴ്സും ആവര്‍ത്തിച്ചിരുന്നു. എല്ലാവരും തന്നെ കമല്‍ ഹാസന്‍ മാപ്പ് പറയണമെന്നാണ് ആഗ്രഹിക്കുന്നതെന്നും നടനുമായി ചര്‍ച്ചയ്ക്ക് തയ്യാറാണെന്നും കര്‍ണാടക ഫിലിം ചേംബര്‍ ഓഫ് കൊമേഴ്‌സ് (കെ.എഫ്.സി.സി) അറിയിക്കുകയായിരുന്നു.

തന്റെ പുതിയ സിനിമയായ തഗ് ലൈഫിന്റെ ഓഡിയോ ലോഞ്ചിനിടെയായിരുന്നു കമല്‍ ഹാസന്റെ വിവാദ പരാമര്‍ശം. കന്നഡ നടന്‍ ശിവരാജ്കുമാറിനെ ചൂണ്ടിക്കാട്ടിയാണ് നമ്മള്‍ രണ്ട് പേരും കുടുംബമാണെന്നും കാരണം തമിഴില്‍ നിന്നാണല്ലോ കന്നട ഉത്ഭവിച്ചതെന്നും കമല്‍ ഹാസന്‍ പറഞ്ഞത്. ഈ പരാമര്‍ശമാണ് വിവാദത്തിന് കാരണമായത്.

കമല്‍ ഹാസന്‍ പരസ്യമായി മാപ്പ് പറയുന്നത് വരെ തഗ് ലൈഫിന് കര്‍ണാടകയില്‍ വിലക്ക് ഏര്‍പ്പെടുത്തുമെന്ന് കര്‍ണാടക ഫിലിം ചേംബര്‍ ഓഫ് കോമേഴ്സും അറിയിക്കുകയായിരുന്നു.

Content Highlight: No apology needed, film will not be released in Karnataka temporarily; Kamal Haasan moves Karnataka High Court over Thug Life controversy