വിഖ്യാത പരിശീലകൻ ജോർജ് സാംപോളി ലാറ്റിനമേരിക്കൻ ഫുട്ബോളിലേക്ക് തിരിച്ചെത്തി. ബ്രസീലിലെ സൂപ്പർ ക്ലബായ ഫ്ലെമെംഗോയുടെ പരിശീലകനായാണ് സാംപോളിയുടെ നിയമനം. ഒരു വർഷത്തെ കരാറിലാണ് ഈ അർജന്റൈൻ പരിശീലകൻ ബ്രസീൽ വമ്പന്മാർക്കൊപ്പം ചേരുന്നത്.
സ്പാനിഷ് സൂപ്പർ ക്ലബ് സെവിയ്യയുടെ പരിശീലകസ്ഥാനത്ത് നിന്ന് സാംപോളി പുറത്തായത് കഴിഞ്ഞ മാസമാണ്. തുടർന്നാണിപ്പോൾ ബ്രസീലിലേക്കുള്ള തിരിച്ചുവരവ്. മുമ്പ് ബ്രസീലിലെ പ്രധാന ക്ലബുകളായ സാന്റോസിനേയും അത്ലിറ്റിക്കോ മിനെയ്റോയേയും സാംപോളി പരിശീലിപ്പിച്ചിട്ടുണ്ട്.
ഫ്ലെമംഗോയുടെ ചരിത്രത്തിലെ രണ്ടാമത്തെ മാത്രം അർജന്റൈൻ പരിശീലകനാണ് സാംപോളി. പോർച്ചുഗീസ് പരിശീലകനായ വിറ്റർ പെരേയ്രയെ പുറത്താക്കിയ ഒഴിവിലേക്കാണ് സാംപോളിയുടെ നിയമനം. ബ്രസീലിലെ ലീഗ് പോരാട്ടമായി സെരി എ നാളെ തുടങ്ങാനിരിക്കെയാണ് സാംപോളിയുടെ വരവ്. കഴിഞ്ഞ തവണ ലീഗിൽ അഞ്ചാം സ്ഥാനത്താണ് ക്ലബ് ഫിനിഷ് ചെയ്തത്.
