അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന ഇന്ത്യ-പാക് മത്സരത്തിനിടെ കാണികളുടെ പെരുമാറ്റത്തിനെതിരെ അന്താരാഷ്ട്ര ക്രിക്കറ്റ് കൗൺസിലിന് (ഐസിസി) പരാതി നൽകിയതിന് പാകിസ്ഥാൻ ക്രിക്കറ്റ് ബോർഡിനെ (പിസിബി) വിമർശിച്ച് മുൻ ക്രിക്കറ്റ് താരം ഡാനിഷ് കനേരിയ. പാകിസ്ഥാൻ കളിക്കാരെ മതകേന്ദ്രീകൃതമായ പ്രാർഥനകൾക്കും മറ്റും വിധേയമാക്കുന്നതിന്റെ നിരവധി വീഡിയോകൾ സോഷ്യൽ മീഡിയയിൽ പ്രചരിച്ചു. ഇതേക്കുറിച്ച് ഐസിസിക്ക് പരാതി ലഭിച്ചിട്ടുണ്ട്.
2023 ലോകകപ്പിൽ പങ്കെടുക്കാൻ ആഗ്രഹിക്കുന്ന പാകിസ്ഥാൻ മാധ്യമപ്രവർത്തകർക്കും ആരാധകർക്കും വിസ നൽകാത്തതിൽ പിസിബി അന്താരാഷ്ട്ര ക്രിക്കറ്റ് കൗൺസിലിൽ പ്രതിഷേധം രേഖപ്പെടുത്തി.
ബോർഡ് മറ്റുള്ളവരുടെ തെറ്റുകൾ കണ്ടെത്തുക മാത്രമാണ് ചെയ്യുന്നതെന്നും സ്വന്തം തെറ്റുകൾ നോക്കുന്നില്ലെന്നും കനേരിയ പറഞ്ഞു. പാക്കിസ്ഥാൻ ടീം ഡയറക്ടർ മിക്കി ആർതർ ലോകകപ്പിനെ ‘ബിസിസിഐ ഇവന്റ്’ എന്ന് വിളിച്ചതും റിസ്വാൻ മൈതാനത്ത് നിസ്ക്കരിക്കുന്നതും ഉൾപ്പെടെയുള്ള സംഭവങ്ങളിലും കനേരിയ പ്രതികരിച്ചു.
ഇന്ത്യയ്ക്കും ഹിന്ദുക്കൾക്കും എതിരെ അഭിപ്രായം പറയാൻ പാകിസ്ഥാൻ മാധ്യമപ്രവർത്തക സൈനബ് അബ്ബാസിനോട് ആരാണ് ആവശ്യപ്പെട്ടത്? ഐസിസി പരിപാടിയെ ബിസിസിഐ പരിപാടി എന്ന് വിളിക്കാൻ മിക്കി ആർതറിനോട് ആരാണ് ആവശ്യപ്പെട്ടത്? കളിസ്ഥലത്ത് നിസ്‌കരിക്കാൻ റിസ്വാനോട് ആരാണ് ആവശ്യപ്പെട്ടത്? മറ്റുള്ളവരുടെ തെറ്റുകൾ കണ്ടെത്തരുത്,” കനേരിയ എക്‌സിൽ പോസ്റ്റ് ചെയ്തു.
അതേസമയം, പിസിബിയുടെ ക്രിക്കറ്റ് മാനേജ്‌മെന്റ് കമ്മിറ്റി ചെയർമാൻ സാക്ക അഷ്‌റഫ് തിങ്കളാഴ്ച തിരിച്ചെത്തിയെന്നും തന്റെ ഇന്ത്യാ സന്ദർശനത്തെക്കുറിച്ച് ചർച്ച ചെയ്യാൻ മുതിർന്ന ബോർഡ് ഉദ്യോഗസ്ഥരുമായി തുടർച്ചയായി കൂടിക്കാഴ്ചകൾ നടത്തുന്നുണ്ടെന്നും വാർത്താ ഏജൻസി പിടിഐ റിപ്പോർട്ട് ചെയ്തു.
“ഇന്ത്യക്കെതിരായ മത്സരത്തിൽ അഹമ്മദാബാദിൽ സക്ക അഷ്‌റഫ് ഉണ്ടായിരുന്നു, ഇന്ത്യൻ ക്രിക്കറ്റ് ബോർഡ് പ്രതിനിധികൾ ഊഷ്മളമായ സ്വീകരണം നൽകിയെങ്കിലും ചില സംഭവങ്ങൾക്ക് സാക്ഷിയായെന്ന് അദ്ദേഹം അറിയിച്ചു. ഇന്ത്യയ്‌ക്കെതിരായ കളിക്കാരുടെ പ്രകടനത്തിൽ സാക്ക അങ്ങേയറ്റം നിരാശനായിരുന്നുവെന്നും മടങ്ങുന്നതിന് മുമ്പ് അഹമ്മദാബാദ് തോൽവി മറന്ന് ശേഷിക്കുന്ന മത്സരങ്ങളിൽ നന്നായി കളിക്കാൻ അവരോട് പറഞ്ഞിരുന്നുവെന്നും റിപ്പോർട്ടുകളുണ്ട്.
നേരത്തെ പാക്കിസ്ഥാൻ ടീം ഡയറക്ടർ ആർതർ, ഇന്ത്യയോടേറ്റ തോൽവിക്ക് ശേഷം കാണികളുടെ പെരുമാറ്റത്തെക്കുറിച്ചും അത് തന്റെ ടീമിൽ ചെലുത്തിയ സ്വാധീനത്തെക്കുറിച്ചും പറഞ്ഞു. ഇന്ത്യയിൽ നടക്കുന്ന ലോകകപ്പ് ഒരു ബിസിസിഐ ഇവന്‍റാണെന്നും ഐസിസി ഇവന്‍റല്ലെന്നും ആർതർ പറഞ്ഞു. ലോകകപ്പ് വിജയകരമായി സംഘടിപ്പിക്കാൻ കായിക ലോക ഗവേണിംഗ് ബോഡി പരമാവധി ശ്രമിക്കുന്നുണ്ടെന്ന് ഐസിസി ചെയർമാൻ ഗ്രെഗ് ബാർക്ലേ പ്രതികരിച്ചു.
