ഉദ്ധവ് താക്കറേയ്ക്ക് കനത്ത തിരിച്ചടി- ആറ് വിമത എം.പിമാരുടെ ലയനത്തിന് ലോക്‌സഭാ സ്പീക്കറുടെ അംഗീകാരം

ഉദ്ധവ് താക്കറേയ്ക്ക് കനത്ത തിരിച്ചടി: ആറ് വിമത എം.പിമാരുടെ ലയനത്തിന് ലോക്‌സഭാ സ്പീക്കറുടെ അംഗീകാരം

മുംബൈ: മഹാരാഷ്ട്രയിൽ ശിവസേന ഉദ്ധവ് വിഭാഗത്തിന് കനത്ത രാഷ്ട്രീയ തിരിച്ചടി നല്‍കിക്കൊണ്ട്, പാര്‍ട്ടിയിലെ ആറ് വിമത എം.പിമാര്‍ മഹാരാഷ്ട്ര മുഖ്യമന്ത്രി ഏക്നാഥ് ഷിന്‍ഡെ നേതൃത്വം നല്‍കുന്ന ശിവസേനയില്‍ ലയിച്ചതിന് ലോക്സഭാ സ്പീക്കര്‍ ഓം ബിര്‍ള ഔദ്യോഗികമായി അംഗീകാരം നല്‍കി.

ഇന്ത്യന്‍ പാര്‍ലമെന്റില്‍ വലിയ തോതിലുള്ള രാഷ്ട്രീയ പുനക്രമീകരണങ്ങള്‍ക്ക് വഴിതുറക്കുന്ന ഈ നിർണായക തീരുമാനത്തെക്കുറിച്ചുള്ള ഔദ്യോഗിക വിജ്ഞാപനം 2026 ജൂലൈ 18 ശനിയാഴ്ചയാണ് ലോക്സഭാ സെക്രട്ടേറിയറ്റ് പുറപ്പെടുവിച്ചത്.

ലോക്സഭാ സ്പീക്കറുടെ ഈ ഭരണപരമായ അംഗീകാരത്തോടെ 18ാം ലോക്സഭയിലെ അംഗങ്ങളുടെ പാര്‍ട്ടി നില പുതുക്കി നിശ്ചയിച്ചിട്ടുണ്ട്. അംഗീകാരം ലഭിച്ച ആറ് എം.പിമാരും ഇനി മുതല്‍ ലോക്സഭയില്‍ ഷിന്‍ഡെ പക്ഷത്തിന്റെ ഭാഗമായി അറിയപ്പെടും.

പാര്‍ട്ടിക്കുള്ളിലെ ആഭ്യന്തര പിളര്‍പ്പിനെത്തുടര്‍ന്ന് ഉദ്ധവ് താക്കറെയുടെ സ്വാധീനത്തിന് മേല്‍ ഏല്‍ക്കുന്ന ഏറ്റവും വലിയ തന്ത്രപരമായ തിരിച്ചടികളിലൊന്നായിട്ടാണ് ഇത് വിലയിരുത്തപ്പെടുന്നത്.

അതേസമയം, ഈ ലയനം ഭരണകക്ഷിയായ ബി.ജെ.പി നേതൃത്വം നല്‍കുന്ന നാഷണല്‍ ഡെമോക്രാറ്റിക് അലയന്‍സിന്റെ (എന്‍.ഡി.എ) പാര്‍ലമെന്റിലെ സാന്നിധ്യം കൂടുതല്‍ വര്‍ധിപ്പിക്കും.

നിലവില്‍ എന്‍.ഡി.എ മുന്നണിക്ക് സഭയില്‍ 292 അംഗങ്ങളാണുള്ളത്. വരും ദിവസങ്ങളില്‍ കൂടുതല്‍ ലയനങ്ങളും പാര്‍ട്ടി മാറ്റങ്ങളും അംഗീകരിക്കപ്പെടുന്നതോടെ സഖ്യത്തിന്റെ അംഗബലം ഇനിയും വര്‍ധിച്ചേക്കുമെന്നാണ് സൂചനകള്‍.

ശിവസേനയിലെ മാറ്റങ്ങള്‍ക്ക് പുറമെ മറ്റ് പ്രധാന പാര്‍ലമെന്ററി പുനക്രമീകരണങ്ങളും സഭയില്‍ നടക്കുന്നുണ്ട്. തൃണമൂല്‍ കോണ്‍ഗ്രസില്‍ (ടി.എം.സി) നിന്ന് വിട്ടുപോയി ‘നാഷണലിസ്റ്റ് സിറ്റിസണ്‍സ് പാര്‍ട്ടി ഓഫ് ഇന്ത്യ’ (എന്‍.സി.പി.ഐ) രൂപീകരിച്ച 20 എം.പിമാര്‍ക്ക് സഭയില്‍ പ്രത്യേക ഇരിപ്പിടം അനുവദിക്കാന്‍ സ്പീക്കര്‍ തീരുമാനിച്ചിട്ടുണ്ട്.

തമിഴ്‌നാട് നിയമസഭാ തെരഞ്ഞെടുപ്പിന് ശേഷം കോണ്‍ഗ്രസുമായുള്ള ബന്ധത്തില്‍ വിള്ളല്‍ വീണതിനെത്തുടര്‍ന്ന്, സഭയില്‍ കോണ്‍ഗ്രസ് അംഗങ്ങളില്‍ നിന്ന് മാറി പ്രത്യേക ഇരിപ്പിടം വേണമെന്ന് ഡി.എം.കെ ആവശ്യപ്പെട്ടിട്ടുണ്ട്. ഈ ആവശ്യത്തിലും സ്പീക്കര്‍ ഉടന്‍ തന്നെ തീരുമാനമെടുത്തേക്കും.

Content highlight: Six Rebel MPs Recognized in Shinde-Led Shiv Sena Shift