ന്യൂദല്ഹി: സംഘടനാ രംഗത്ത് വന് അഴിച്ച് പണിയുമായി ബി.ജെ.പി. വരാനിരിക്കുന്ന തെരഞ്ഞെടുപ്പുകള് ലക്ഷ്യം വെച്ചാണ് നടപടി. ഇതിന്റെ ഭാഗമായി വിവിധ സംസ്ഥാനങ്ങളിലെ പാര്ട്ടി ജോയിന്റ് ജനറല് സെക്രട്ടറിമാരെ പ്രഖ്യാപിച്ചു. തെരഞ്ഞെടുപ്പ് ഒരുക്കങ്ങള് ശക്തമാക്കുന്നതിന്റെ ഭാഗമായാണ് പുതിയ പ്രഖ്യാപനം.
പുതിയ ഉത്തരവുകള് പ്രകാരം, ദേശീയ ജോയിന്റ് ജനറല് സെക്രട്ടറി ശിവപ്രകാശ് ആന്ധ്രാപ്രദേശ്, മഹാരാഷ്ട്ര, മധ്യപ്രദേശ്, ഛത്തീസ്ഗഢ്, ഗോവ എന്നീ സംസ്ഥാനങ്ങളുടെ സംഘടനാ ചുമതല നിര്വഹിക്കും.
മറ്റൊരു ദേശീയ ജോയിന്റ് ജനറല് സെക്രട്ടറിയായ സൗദാന് സിങിന് ബിഹാര്, ജാര്ഖണ്ഡ്, ഒഡീഷ, പശ്ചിമ ബംഗാള് എന്നീ സംസ്ഥാനങ്ങളുടെ ചുമതലയാണ് നല്കിയിരിക്കുന്നത്. കൂടാതെ, ദേശീയ സംഘാതക് വി. സതീഷ് എസ്.ടി മോര്ച്ചകളുടെ സംഘടനാ കാര്യങ്ങളുടെ ചുമതലയും പാര്ലമെന്റ് ഓഫീസിന്റെ ചുമതലയും ഏറ്റെടുക്കും.
അടുത്ത രണ്ട് വര്ഷത്തിനുള്ളില് 11 സംസ്ഥാനങ്ങളിലെ എന്.ഡി.എ സര്ക്കാരുകളെ സംരക്ഷിക്കേണ്ട ചുമതല ബി.ജെ.പിക്കാണുള്ളത്. ഇതിന്റെ ഭാഗമായി വിവിധ സംസ്ഥാനങ്ങളിലെ ചുമതലക്കാരെ പാര്ട്ടി കഴിഞ്ഞ ദിവസം പ്രഖ്യാപിച്ചിരുന്നു.
അടുത്ത വര്ഷം ആദ്യത്തോടെ നിയമസഭാ തെരഞ്ഞെടുപ്പ് നടക്കാനിരിക്കുന്ന സംസ്ഥാനങ്ങളാണ് ഗോവ, പഞ്ചാബ്, ഉത്തരാഖണ്ഡ്, ഉത്തര്പ്രദേശ്, മണിപ്പൂര് എന്നിവ. ഇതില് പഞ്ചാബിന്റെ പാര്ട്ടി ചുമതല ദേശീയ ജനറല് സെക്രട്ടറി സതീഷ് പൂനിയയ്ക്കാണ് നല്കിയിരിക്കുന്നത്. അല്ക്ക ഗുര്ജര്, വീരേന്ദ്ര സച്ച്ദേവ എന്നിവരാണ് പഞ്ചാബിലെ സഹചുമതലക്കാര്.
പ്രധാനമന്ത്രി നരേന്ദ്ര മോദിയുടെ സ്വന്തം സംസ്ഥാനമായ ഗുജറാത്തില് 2027 ഡിസംബറിലാണ് തെരഞ്ഞെടുപ്പ് നടക്കുന്നത്. ഇവിടെ പാര്ട്ടി ചുമതല ഏല്പ്പിച്ചിരിക്കുന്നത് തരുണ് ചുഘിനെയാണ്. വരാനിരിക്കുന്ന തെരഞ്ഞെടുപ്പുകള് ബി.ജെ.പിക്ക് വളരെയധികം നിര്ണായകമാണ്. പ്രതിപക്ഷ പാര്ട്ടികളുടെ വെല്ലുവിളികളും വിവിധ പ്രതിഷേധങ്ങളും നേരിടുന്ന സാഹചര്യത്തില് പാര്ട്ടിയെ അടിത്തറ മുതല് ശക്തമാക്കാനാണ് ബി.ജെ.പിയുടെ നീക്കം.
Content Highlight: Major reshuffle within the BJP ahead of elections; aim is to safeguard NDA governments in 11 states.
