അഭിപ്രായ സ്വാതന്ത്ര്യത്തെക്കുറിച്ചും സെന്‍സര്‍ഷിപ്പിനെതിരെയും വീണ്ടും ശബ്ദം ഉയര്‍ത്തി ഇലോണ്‍ മസ്‌ക്. ഇന്ത്യയില്‍ സോഷ്യല്‍ മീഡിയ നിയമങ്ങള്‍ കര്‍ശനമാണ്. കമ്പനി ഇന്ത്യയിലെ നിയമങ്ങള്‍ പാലിച്ചില്ലെങ്കില്‍ ജീവനക്കാര്‍ ജയിലിലാകും. അമേരിക്കന്‍ ഉപയോക്താക്കള്‍ക്കും മറ്റ് പാശ്ചാത്യ രാജ്യങ്ങള്‍ക്കും ലഭിക്കുന്ന അതേ സ്വാതന്ത്ര്യം ഇന്ത്യന്‍ ഉപയോക്താക്കള്‍ക്കും നല്‍കാന്‍ വെബ്സൈറ്റിന് കഴിയില്ലെന്നും അദ്ദേഹം പറഞ്ഞു. ബിബിസിക്ക് നല്‍കിയ അഭിമുഖത്തിലാണ് ട്വിറ്റര്‍ മേധാവി ഇന്ത്യയെക്കുറിച്ചും സെന്‍സര്‍ഷിപ്പിനെക്കുറിച്ചും സംസാരിച്ചത്.
ഇന്ത്യയെക്കുറിച്ച് മസ്‌ക് പറഞ്ഞത്
ട്വിറ്റര്‍ ചിലപ്പോള്‍ ഇന്ത്യയിലെ ഉള്ളടക്കം സെന്‍സര്‍ ചെയ്യാറുണ്ട്. ചിലത് തടയേണ്ടി വരുന്നു. കമ്പനി ഇന്ത്യയിലെ നിയമങ്ങള്‍ പാലിച്ചില്ലെങ്കില്‍ ജീവനക്കാരെ ജയിലിലേക്ക് അയക്കേണ്ടി വരും.
‘സോഷ്യല്‍ മീഡിയയില്‍ എന്ത് കാണും?ഇന്ത്യയില്‍ ഇത് സംബന്ധിച്ച് കര്‍ശനമായ നിയമങ്ങളുണ്ട്… ഒരു രാജ്യത്തിന്റെ നിയമങ്ങള്‍ക്ക് വിരുദ്ധമായി നമുക്ക് പോകാനാവില്ല.ഒന്നുകില്‍ നമ്മുടെ ആളുകള്‍ ജയിലില്‍ പോകണം അല്ലെങ്കില്‍ നിയമങ്ങള്‍ പാലിക്കേണ്ടിവരും എന്ന രണ്ട് ഓപ്ഷന്‍ മാത്രമേ ഉള്ളൂവെങ്കില്‍, ഞങ്ങള്‍ നിയമങ്ങള്‍ പാലിക്കും’, അഭിമുഖത്തില്‍ മസ്‌ക് പറഞ്ഞു.
സെന്‍സര്‍ഷിപ്പിനെ മസ്‌ക് എതിര്‍ത്തിരുന്നു
ബിബിസി പോസ്റ്റുകള്‍ ബ്ലോക്ക് ചെയ്യുന്നതിനെക്കുറിച്ച് ചോദിച്ചപ്പോഴാണ് അദ്ദേഹത്തിന്റെ പ്രതികരണം. ട്വിറ്ററിന് മുമ്പും സെന്‍സര്‍ഷിപ്പും ഉള്ളടക്ക മോഡറേഷനും ഉണ്ടായിരുന്നു.മസ്‌ക് അതിനെ എതിര്‍ത്തു. കഴിഞ്ഞ വര്‍ഷം ഒക്ടോബറില്‍ 44 ബില്യണ്‍ ഡോളറിനാണ് മസ്‌ക് ട്വിറ്റര്‍ കരാര്‍ പൂര്‍ത്തിയാക്കിയത്. ഏപ്രിലില്‍ തന്നെ അദ്ദേഹം ട്വിറ്ററില്‍ ഓഹരികള്‍ വാങ്ങുകയും പിന്നീട് കമ്പനി വാങ്ങാമെന്ന് വാഗ്ദാനം ചെയ്യുകയും ചെയ്തു.
സെന്‍സര്‍ഷിപ്പിനെതിരെ
ചില ഉള്ളടക്കം ഒരാള്‍ക്ക് ആക്ഷേപകരമായിരിക്കാമെന്നും അതേ ഉള്ളടക്കം മറ്റുള്ളവര്‍ക്ക് ആക്ഷേപകരമാകണമെന്നില്ലെന്നും മസ്‌ക് നിലപാട് എടുത്തിരുന്നു. ഇത്തരമൊരു സാഹചര്യത്തില്‍ എന്താണ് ആക്ഷേപകരമെന്നും അത് ട്വിറ്ററില്‍ നിന്ന് നീക്കം ചെയ്യണമെന്ന് ആരാണ് തീരുമാനിക്കുകയെന്നും അദ്ദേഹം ചോദിച്ചിരുന്നു. നേരത്തെ ജാക്ക് ഡോര്‍സിയുടെ കാലത്ത് നടപ്പിലാക്കിയ പല നിയമങ്ങളും മസ്‌ക് മാറ്റിയിട്ടുണ്ട്. ട്വിറ്ററില്‍ അപ്ലോഡ് ചെയ്യുന്ന ഉള്ളടക്കത്തെക്കുറിച്ച് ജാക്ക് ഡോര്‍സി വളരെ സെന്‍സിറ്റീവ് ആയിരുന്നു. വിദ്വേഷകരമായ ഒരു ഉള്ളടക്കവും ട്വിറ്ററില്‍ പോസ്റ്റ് ചെയ്യരുതെന്ന് അദ്ദേഹം വിശ്വസിച്ചിരുന്നു.
